法國國民議會喺審議2026年財政預算法案首讀期間，以208票贊成、87票反對，通過政府提出嘅措施：對來自歐盟以外地區、價值低於150歐元嘅「小型包裹」每件徵收2歐元處理費。呢項新費用將喺2026年1月1日起實施，主要用作加強海關監管，包括購買掃描設備、增聘海關人手，預計每年帶來約5億歐元收入。

法國預算部長蒙沙蘭（Amélie de Montchalin） 喺議會辯論中強調，呢項「處理費」唔係一般稅收，而係針對經常出現安全風險產品嘅專項資金。佢指出，不少境外低值包裹含有唔符合歐盟標準嘅危險物品，當中包括近期喺部分中國電商平台檢出嘅違規產品。佢形容法國今次做法係「走在歐盟前面」，並會同比利時、荷蘭同盧森堡一樣，喺2026年1月同步實施，比其他歐盟成員國早9個月。佢又提醒，歐盟財長理事會已喺11月13日達成共識，原則同意喺2026年第一季起取消此類低值包裹嘅關稅豁免。

呢項措施一推出即刻引發爭議。國民聯盟（Rassemblement National）議員強烈反對，索姆省議員 批評，呢根本唔係「阻止中國不公平競爭嘅稅」，反而係直接加重法國民眾同中產階級負擔嘅「消費稅」。國民聯盟主席 Marine Le Pen 亦質疑實際效能，指2024年只有0.125%嘅包裹接受檢查，「聲稱靠徵費就可大幅提升檢查率，簡直係呃人」。

左翼政黨「不屈法國」最初亦表示憂慮，擔心稅負最終將會轉嫁畀消費者，要求政府改為直接向電商平台徵費，而唔係針對每件包裹，甚至揚言會投反對票。政府其後提交修正案回應關切：允許透過現有嘅「增值稅通道」，由平台負責申報及繳納嘅系統，去收取相關費用。呢個調整成功說服「不屈法國」轉為支持，令措施順利過關。

背景方面，歐盟近年面對來自中國電商平台如 Shein、Temu 同 AliExpress 嘅低價包裹湧入，每年數量超過40億件，當中超過九成源自中國。呢啲包裹目前享有關稅及部分增值稅豁免，導致歐盟本土零售業面臨競爭劣勢，仲帶來產品安全同環境風險。法國今次做法被視為走前一步，填補監管漏洞，同時為歐盟未來改革鋪路。歐盟委員會正推動喺2028年展開海關改革，其中包　括類似固定費用機制，但法國等國家唔願再等，選擇率先行動。

議會亦同時刪除另一項爭議條款，原本計劃對所有吸食類產品（無論含煙草或尼古丁）統一徵稅。上塞納省「復興黨」議員 辯稱，電子煙已經協助約70萬法國人成功戒煙，係「有效且危險性遠低於傳統香煙嘅替代方案」，甚至「可以挽救生命」。多名議員，包括佢本人，都分享親身經驗，最終說服議會放棄徵此稅。

呢項包裹處理費嘅通過，突顯法國政府喺經濟主權及消費者保護方面嘅強硬取態。法國預算部長蒙沙蘭強調：「唔支持嘅議員，其實係選擇站在中國嘅淹沒式競爭一邊，而唔係站在法國商戶同國民嘅利益一邊。」不過，反對派就警告，如果電商平台改為轉運至歐盟內部，或者直接喺歐盟倉庫出貨，呢項新費用效用將會大幅削弱。