中國政府於2023年8月，以福島第一核電廠核處理水排海為由，全面停止進口日本水產品。今年6月29日，中國海關總署突襲式宣布，有條件恢復進口日本部分地區嘅水產品。不過，隨著近日中日關係緊張，日本《共同社》報道，中國政府今日（19 日）向日方通報，表示暫停進口日本水產品。

去年9月，中日雙方達成共識放寬禁令。日本方面表示，雙方喺今年5月底就恢復進口日本水產嘅必要條件達成共識。今年6月29日，中國海關總署發公告指出，日本企業喺完成中國方面嘅註冊手續後，即可恢復對中國出口水產品。不過，出口時必須附上日本官方出具嘅衛生證書、放射線物質檢驗合格證明同產區證明。而繼續禁止進口嘅10個都縣分別係福島縣、群馬縣、栃木縣、茨城縣、宮城縣、新潟縣、長野縣、埼玉縣、東京都同千葉縣。

中國過去曾經係日本水產品最大市場，據統計，日本2022年向中國出口價值871億日圓嘅水產品，包括珍珠同珊瑚。但呢個數字喺2023年下跌至610億日圓，而2024年上半年更進一步跌至僅僅35億日圓。日本農業、林業同漁業產品總體出口喺2024年上半年自2020年以來首次下滑，主要係因為對中國嘅出口暴跌43.8%所致。鮮貝出口受影響最嚴重，較去年同期下跌37%。

早前中方突然恢復進口日本水產品時，官媒《環球時報》前總編輯胡錫進曾發文為當局解畫稱，「近兩年前的抵制和今天的恢復決非彼此矛盾的。在如此重大的安全問題上，我深信，中國人民的利益在哪裡，政府的行動就會指向哪裡。」佢話，「我們作為中國老百姓在這個問題上跟著政府的態度走，這是最為明智，也最能保障我們大家集體利益的選擇。」

 胡錫進稱，日本喺2023年8月啟動排放核污染水，當時中日關係一度尖銳衝突。而家事隔差唔多兩年，中國政府做出恢復日本部分地區水產品進口嘅決定。胡錫進指出，冇任何人掌握嘅信息會多過政府，而政府處理呢個問題時只會從中國人民嘅利益出發，絕對唔會從日本嘅利益出發。今年喺國際原子能機構組織下，中方專家赴日本福島採集咗多種唔同樣本，進行獨立取樣檢測，為恢復進口日本水產品唔會對中國人安全構成風險提供咗科學依據同保障。

 胡錫進稱，有人可能擔心北京會受到東京嘅壓力，而不得不作出讓步。佢認為，「這種擔心不能不說是多餘的。中國政府在原則問題上硬懟美國都毫不含糊，怎麼可能會在中日之間拿中國人的安全做交易？它完全是不可思議的事情。」唔知道今次北京當局又又又改變做法時，胡錫進又有咩理由呢？

日本經濟安全保障大臣小野田紀美昨日（18日）喺記者會上措辭堅定地回應，明確指出中國「一旦表達不滿即訴諸經濟脅迫」，並忠告日本各界「不宜過度依賴」呢種隨時會「政策反覆」嘅國家。