中日關係因「台灣有事」爭議持續升溫，北京更在上周突然升級風險提示，觸發旅遊及航空市場連鎖反應。中國外交部領事司喺14號晚無預警發出罕見強硬通告，公開呼籲國民「近期暫勿前往日本」。香港特區政府保安局亦喺翌日（15日）更新外遊警示，補充有關日本治安惡化嘅內容。內地多間航空公司隨即宣佈，凡12月31日前出發、並符合條件嘅赴日機票，旅客可獲免費退改。唔少內地旅客陸續回報，部分航空公司已順利辦理全額退款，包括在內地航空公司購買嘅赴日機票，有網民成功全額退票；亦有人表示已向香港快運（HK Express）透過官方微信客服查詢，確定可獲全額退款。

香港保安局喺官網更新日本外遊提示，指出自2025年中以來，日本涉及中國公民嘅遇襲事件呈上升趨勢。警示特別提醒計劃前往日本或正在當地嘅香港居民必須加強戒備，留意當地最新情況以及中國駐日使領館發佈嘅相關信息，以保障人身安全。同一頁面更羅列2024年至今日本多宗突發事件，包括近日喺日本社會熱議嘅野熊襲擊，以及11月9日發生喺岩手縣外海嘅6.7級地震，當地政府更一度發出海嘯預警。

根據旅遊平台「飛豬」公布嘅資料，目前支持赴日航線免費退票嘅內地航空公司多達12家，包括：

* 中國國際航空（國航）

* 東方航空

* 南方航空

* 四川航空

* 廈門航空

* 海南航空

* 春秋航空

* 天津航空

* 吉祥航空

* 深圳航空

* 山東航空

* 首都航空

目前旅客喺「飛豬」平台申請退票時，系統會額外出現「因日本航線影響特殊退票」選項，但平台強調該選項並不等同「必然可退」，最終能否退款仍取決於各航空公司政策。多名內地網民表示，喺「攜程」與「飛豬」預訂嘅赴日機票已成功免費退票，並顯示係「因日本航線客票特殊處置方案」，航空公司通知免收退票費。不過亦有人不安稱，自己預訂嘅係外國航空公司機票，未知能否同樣免費退票。

有網民展示截圖，指已向香港快運（HK Express）官方微信公眾號查詢，客服明確回覆：12月31日前飛往日本嘅所有航班，可免費全額退款，旅客只需於退票原因選擇「非自願取消行程」即能辦理。據了解，今次內地12家航空公司提供免費退票嘅適用範圍為：

* 購票時間：2025年11月15日12:00前購買

* 出發日期：2025年11月15日至12月31日之間

已於該時間之前完成退票或改簽嘅旅客則不適用。同時，國航客服明確表示，只要符合以上條件，往返票亦可全額退。

內媒《極目新聞》報道稱，日本兩大航空公司——全日空（ANA）與日本航空（JAL）暫未跟進。「全日空中國客戶服務中心」接線人員僅稱「暫無特殊政策」。日本航空客服同樣表示未有推出任何特殊退改措施，並指出制定政策嘅部門於雙休日不上班，因此周六日亦不會公布新安排。

OTA平台「攜程」客服亦證實：目前嘅特殊退票政策主要來自「多家內地航空公司」，並非全部航空公司提供免費退改；旅客需依照購票航空公司政策處理。飛豬客服亦重申，「涉日航線」的確會出現特殊退票選項，但是否能退成功要視乎航司最終規定。