亞馬遜（Amazon）近日宣布全球推行新一輪「組織優化」，大手筆裁減大約一萬四千個企業白領職位，橫跨人力資源、雲端服務、廣告、設備與服務等多個核心部門。呢次係自2022年年尾以嚟，公司最大規模嘅人手重組行動，震動全球科技圈。

中國成重災區　有部門直接「斬半」　管理權限被收回美國

根據台灣《中央社》引述內媒《南方都市報》11月10日嘅報道，記者由一名近期先離職嘅亞馬遜中國前員工口中得知，中國區裁員比例比其他市場更辣，有部門更係「一刀切」減走一半人手，原本喺本地嘅管理權亦被上調返去美國總部。

呢名前員工講到，公司上星期仲安排佢四圍出差，拜訪跨境電商嘅大型賣家，同時跟進平台點樣向內地稅務機關披露賣家收入等事宜，但到今星期初就突然收到HR通知。佢話：「後來仲發現，出嚟通知我哋嗰個HR自己都收到被裁郵件。」佢承認，之前公司內部一直有傳話要「優化架構」，但都冇諗過會咁集中、咁急、咁大刀闊斧咁動手。

AI轉型主導裁員　高層：互聯網後最大技術變革

自2022年開始，亞馬遜已經累計炒咗超過2.7萬名員工，呢次新一輪再度引起外界高度關注。亞馬遜人力體驗與技術高級副總裁Beth Galetti喺內部信入面解釋，裁員目的係為配合企業全面投入AI轉型，令組織更加敏捷。佢寫道，人工智能係「自互聯網誕生以嚟最具破壞式嘅技術」，公司要透過將資源重新調配到最優先嘅業務方向，先可以喺下一個科技浪潮入面保持競爭力。

值得留意嘅係，亞馬遜2025財政年度第二季業績仍算亮眼，淨銷售額達1,677億美元，按年增長13%；淨利潤更達182億美元，大升35%。

不過公司國際業務增速明顯降溫，今年第一季淨增長得返4.9%，令外界更關注亞馬遜喺非美市場尤其係亞太區嘅業務策略。

中國全面凍結招聘　中層成「首斬對象」　管理7人以下必炒

多名中國區員工透露，亞馬遜中國已全面暫停大部分招聘工作，各部門嘅人手預算大幅縮緊，中層管理者成為呢輪裁員嘅頭號對象。總部以「人手冗餘」為理由，劃定咗一套近乎「機械式」嘅硬指標：只要你嘅團隊管理人數少於7人，就會被直接列入裁員名單，基本上無得商量。裁員範圍覆蓋ESM（賣家管理團隊）、LCS等核心業務部門，部分團隊甚至整個架構被一次過解散。有員工指，ESM部門內部已明講，呢次裁員目標係削減至少五成。

據悉，公司為被影響員工提供90日內部轉崗期，三個月內如果搵唔到新崗位，可以獲得遣散費、再就業服務以及一段時間嘅醫療保險等補償安排。一名已經簽署離職協議嘅員工話：「遣散費還是大方給足的。」