台灣《中央社》引述美媒《華爾街日報》報道，美國持續加強對中國的晶片出口限制，令內地高端晶片短缺問題惡化至前所未見嘅程度，北京已開始直接干預最大代工廠中芯國際嘅產出分配，要求優先供應華為同其他「國家級領軍企業」。同一時間，中國科技企業為應付算力不足，紛紛採用極不理想嘅「捆綁式晶片」策略，試圖硬撐AI運算需求。

北京直接干預中芯國際　要求產能優先留畀華為

習近平喺10月30日與美國總統特朗普會面時，雖然被形容為達成「部分貿易協議」，但美方並無撤銷任何晶片出口限制。特朗普甚至冇同習近平討論輝達（Nvidia）最新、同時亦係最先進嘅Blackwell AI晶片。對北京而言，形同「完全無讓步」。

《華爾街日報》12日報道引述多名知情人士指，中國半導體短缺情況之嚴重，已經令國內科技公司進入「搶購模式」，大家爭著分到極為有限嘅存貨。有AI新創公司深度求索（DeepSeek）因為搶唔到晶片，今年較早時間被迫推遲其最新AI模型嘅發布。知情人士透露，北京已經唔再只係「指導」，而係正式插手中芯國際嘅產能分配，要求集中支援華為同國家指定嘅關鍵企業。華為近期更利用中芯較落後嘅工藝，生產屬於自己嘅AI晶片。呢種做法，某程度上意味住：中國要用有限嘅產能，集中保護「國家隊」。

除咗官方干預產能，更荒誕嘅係企業端嘅「土炮式」補救方式。華為等大型科企開始將成千上萬嘅晶片綁在一個龐大系統入面，用超高耗電嘅方法湊夠運算力訓練AI模型。另有上海沐曦集成電路（MetaX）走另一條路：用較舊、容易買到嘅工藝設計晶片，再將兩粒甚至更多小晶片封裝在一個模組入面，以減低單一晶片算力不足嘅問題。但呢種做法，雖然「頂得住一時」，卻造成數據中心耗電爆炸式增加，迫使多個地方政府需要提供電費補貼救場。

中國科企千粒晶片綁一齊硬拼算力

由於正規管道買唔到高端晶片，有企業轉向灰色渠道。有人走私輝達產品入境，有企業則以跨境方式使用海外雲端運算平台嘅輝達GPU。

《華爾街日報》記者見到嘅合約顯示，至少16個冰箱大小嘅Blackwell機架原定11月交付，但因為受到管制，被拆成細件運入內地，再喺當地重組。

呢啲規模固然不足以訓練最先進嘅大型AI模型，但對於研發、測試高強度演算法仍然具備價值。

中國政府正加速推動晶片自給自足，並指示國有數據中心全面停用輝達晶片，甚至有中心將已經投入運作嘅輝達GPU整批關掉。有關部門亦通知企業避免再用輝達舊型號，外界認為呢係北京為未來談判「提高籌碼」。然而，現實係：中國工程師已長期依賴輝達嘅專有軟件生態系統，轉用國產替代品後問題叢生，包括過熱、系統崩潰、缺乏軟件支援等。

中國半導體短期內難以突破，最大原因係美國禁止向中國出口極紫外光曝光機（EUV）等關鍵設備。冇EUV，中芯國際只能依賴效率更低、出錯率更高嘅舊技術，直接影響晶片良率。摩根士丹利分析師喺9月報告估計，若以中芯現有工藝製造華為昇騰910C晶片，每100粒可能有多達95粒係廢品。對追求高效能AI晶片嘅中國而言，呢個良率係災難級別。