綜合日本媒體報導，日本首相高市早苗今日（10日）喺眾議院接受質詢時，再次就早前講過「台灣有事可能構成存亡危機事態」一事表態。佢重申，自己7日嘅發言係依照政府一貫立場，冇打算撤回或取消。

事件起於7日，喺眾議院預算委員會上，立憲民主黨前外相岡田克也質詢高市早苗：「台灣有事」會唔會被視為日本安全保障法制下可行使集體自衛權嘅「存亡危機事態」？高市當時答話講得好直接：「如果涉及出動戰艦、伴隨使用武力，我認為係有可能構成存亡危機事態。」佢又補充，具體判斷要視乎事件發生時嘅實際情況，由政府綜合所有資訊作出判斷，「如果真係發生武力攻擊，被認定為存亡危機事態嘅可能性就好高。」

佢進一步講：「假設美軍為解除封鎖而出動協助，而為咗阻止美軍介入，對方可能採取武力行動，呢啲情況都有機會構成危機；但如果只係用民間船隻排成一列，造成海上通行困難，我就認為唔會構成存亡危機事態。」

所謂「存亡危機事態」（日文稱「存立危機事態」），係日本喺2015年通過安全保障法制時新增嘅一項概念。意思係，即使日本本土冇直接受攻擊，但若果美國等同日本有密切關係嘅盟國遭到武力攻擊，導致日本國家安全出現「生存受到威脅、國民生命同權利面臨根本危險」嘅情況，就可以成為自衛隊行使有限度集體自衛權嘅法理基礎。

今日喺眾議院預算委員會上，立憲民主黨眾議員大串博志再度追問高市，要求佢釐清立場。高市早苗喺答辯中強調：「我講嘅內容係根據政府既有見解，冇打算撤回或取消。不過，作為反省，今後唔會再明確假設特定情境嚟講。」

佢又解釋，自己當時係基於「最壞情況假設」作答，「所以講得比較具體」，但日後會避免再以呢種方式表達。大串博志就話，呢個問題牽涉「判斷是否進入戰爭」嘅重大政策層面，要求政府就此提出統一見解。高市回應指，暫時冇打算將7日嘅答辯內容當作政府統一見解發布。

所謂「統一見解」，係日本政府面對重大且具爭議議題時，為釐清分歧、對國會在野黨同社會公開表明立場而發表嘅官方立場文件。