日本各地近來「熊出沒注意」嘅情況愈嚟愈嚴重，尤其係秋田縣，熊襲擊人嘅個案不斷上升，造成多宗死傷。面對呢種「戰時狀態」嘅嚴峻局面，地方政府被迫採取撲殺行動嚟保障市民安全。不過，呢啲行動就引嚟咗一班保育人士嘅強烈不滿同抗議。前秋田縣知事佐竹敬久近日接受日媒訪問時，就對呢啲「齋噏唔做」嘅抗議者大發雷霆，重提佢昔日「不如送隻熊去你屋企」嘅寸爆言論，強調喺人命關天嘅時候，保育真係要「收埋先」。

自從今年入秋以嚟，日本全國多地都傳出多宗熊襲擊事件，根據最新數字，被熊攻擊死亡嘅人數已經升到十幾人，創下有紀錄以嚟嘅新高。秋田縣就係其中一個重災區。為咗確保居民嘅生命安全，秋田縣政府決定大規模捕殺闖入民居範圍或襲擊過人嘅熊隻，但隨即收到大量嚟自全國各地「唔好殺熊」嘅抗議電話同電郵，嚴重阻礙咗公務人員嘅工作。

現年 77 歲嘅佐竹敬久，由2009年開始擔任秋田縣知事長達16年，直到今年四月先卸任。佢喺任內一直採取對抗熊害嘅強硬立場。對於嗰啲只顧保育而無視人命嘅抗議者，佐竹喺訪問中憶述，佢哋曾經用「稅金小偷」、「根本冇做嘢」等難聽說話嚟謾罵前線公務員，令佢覺得好嬲。

佐竹敬久直言，嗰啲打電話嚟嘅人根本唔了解實情有幾咁恐怖。清晨同夜晚都冇人敢一個人出街。學校嘅運動會、遠足、馬拉松比賽全部都要取消晒。居民每日都活喺恐懼之中。」

佢回想起自己喺知事任內，見過好多被熊襲擊死者嘅遺體：「有啲人成個頭骨俾熊拍碎咗，有啲人半塊臉都冇咗，仲有人連個頭都甩埋。」即使有人大難不死，都好大機會盲眼或者毀容，基本上好難再融入番正常社會生活。

最令人印象深刻嘅係，佐竹喺上年12月縣政府收到大量反對獵殺嘅電話時，曾經「火遮眼」回覆抗議者：「不如你畀個地址我，我依家就送隻熊去你屋企。」呢句「寸爆」嘅說話當時引起咗極大關注。

佐竹解釋，熊隻一旦襲擊過人類，就會「記住」人嘅氣味，之後好大機會再襲擊，所以必須要撲殺。佢強調，喺而家呢種情況，最緊要係「令人類生活恢復正常，先可以講與熊共存」。

事實上喺東亞地區，市民毫無反抗能力嘅情況並唔罕見。一旦解除人民武裝，嚴格管制武器，治安看似穩定實則危險未至而已。最近嘅熊患，正正就係因為啲熊意識到人類根本冇得還手，易於獵殺。單單槍枝散發嘅金屬味，已足以令熊忌憚。如果再有幾隻中彈而死嘅熊屍，俾佢哋啲同類見到，令熊意識到「攻擊人類好危險」，咁樣市民先會有真正嘅安全。