明報報導，立法會選舉將於12月7日舉行，各個政府官員近排密密落區宣傳，希望推高投票率。商務及經濟發展局局長丘應樺昨（9日）喺荃灣街市附近擺街站，派發宣傳品鼓勵選民投票；律政司司長林定國過去兩個星期亦頻頻出席唔同場合，呼籲市民積極投票，佢強調，立法會選舉嘅結果，直接影響香港治理嘅水平，同時市民對選舉嘅投入程度，都會影響中央點睇香港。林定國話，要確保「一國兩制」行穩致遠，好重要嘅一點，就係要令中央對香港人有信心，對香港發展感到安心。

林定國喺社交平台發文講，今次立法會換屆選舉係一次「重要實踐」，亦係香港人向中央展示信心同決心嘅機會，證明香港喺現行憲制秩序下，堅定支持「愛國者治港」原則下嘅選舉制度。佢形容，積極參與投票係行使憲法權利，亦係推動社會持續向前發展嘅重要動力。

教育局局長蔡若蓮今日亦喺社交平台出post，話最近去咗教育局唔同辦公室，親自呼籲同事出嚟投票。佢指，教育局已特別安排時間，方便喺投票日需要返工嘅人都可以投票。蔡若蓮又話，作為公務員團隊一分子，更加應該以身作則，履行公民責任，踴躍投票。

至於房屋局局長何永賢，就繼續以創意方式宣傳投票。佢今日公開咗「選舉小劇場」第二集，劇中嘅吉祥物「票箱家族」現身房委會總部拍宣傳短片。何永賢同副局長戴尚誠親自派發宣傳單張，並表示下一站會落屋邨繼續推廣，鼓勵居民積極參與選舉。

公務員事務局方面，近日推出新一版嘅選舉宣傳海報，喺原有官方版本基礎上「加工」加料，融入咗剪紙藝術元素，剪出「公務員」嘅字樣，令口號「公務員齊投票」更加突出。公務員事務局局長楊何蓓茵、常任秘書長梁卓文、公務員學院院長郭蔭庶等人一齊喺海報前高呼口號：「12月7日，公務員齊投票！」呼籲所有公務員以身作則，積極履行投票責任。

而規劃署署長葉子季上星期五出席城市規劃委員會轄下嘅小組會議時，亦開腔呼籲委員踴躍投票，帶動家人朋友一齊投票，特別希望建築、測量、城市規劃同園境等專業界別嘅人士積極響應，投下關鍵一票。