為咗徹底攻下烏克蘭東部嘅頓巴斯地區，俄羅斯喺過去一年一直全力進攻頓巴斯西部前線重鎮「波克羅夫斯克」（Pokrovsk），又被稱為「紅軍城」。呢個城市係重要嘅公路同鐵路樞紐，一旦失守，將為俄軍打開通往烏克蘭中部嘅「大門」。

根據《路透社》報道，喺呢場近四年嘅戰爭入面，攻佔烏東工業區頓巴斯（Donbas）一直係俄方嘅主要戰略目標之一。頓巴斯地區由盧甘斯克州（Luhansk）同頓內茨克州（Donetsk）組成，目前俄軍已經全面控制盧甘斯克州，並掌握咗約九成頓內茨克州。換句話講，頓巴斯地區淨返約10%，即約5,000平方公里土地仍由烏方掌控，主要集中喺頓內茨克西部，而波克羅夫斯克就正係最後一道防線。

烏克蘭媒體《基輔獨立報》（Kyiv Independent）報導，烏克蘭部隊喺波克羅夫斯克同鄰近嘅米爾諾赫拉德（Myrnohrad）仍堅守陣地，面對俄軍幾乎冇停過嘅猛攻，形勢愈趨危急。連日嘅巷戰令城市陷入混亂，控制權完全模糊。一名匿名烏軍無人機操作員形容：「Pokrovsk 冇乜變化，成個地方亂晒，我哋啲兵同俄軍啲雜碎混喺一齊，分唔到邊個打邊個。」

自俄軍大批突入城市以來，Pokrovsk 已經變成混戰區。南側防線短時間內崩潰，烏軍幾乎無法再建立有效防禦。根據戰場地圖 Deep State 顯示，截至11月6日，Pokrovsk 大部份市區仍屬「爭奪狀態」，俄烏雙方勢力交錯。Deep State 共同創辦人 Roman Pohorilyi 指出，「講包圍唔準確，因為所謂嘅包圍，係當補給線被切斷先算。現實上，敵軍只係滲透入城，一點一滴噬住佢。」

隨住俄軍小股突擊隊一路北推，烏方防線被撕開。原本負責監控敵軍嘅無人機部隊，開始被拖入近距離戰鬥。前線操作員無奈表示：「我哋應該負責鎖定殺傷區，但而家要兼顧自保，連操作都難集中。」俄方同時用無人機瘋狂打擊烏軍後勤，據報有幾十支來自「Rubicon 學校」嘅無人機特戰隊，已經部署喺前線。烏軍「Peaky Blinders」分隊成員 Artem Fysun 回憶：「30 日前我哋路過一個十字路口，只見一架我哋被炸嘅車；唔夠一個月，嗰度已經有十幾架殘車，啲裝備俾敵人炸到七零八落。」

隨住冬季逼近，呢場波克羅夫斯克攻防戰已不再只係軍事問題，而係政治象徵。俄羅斯總統普京上月29日提前宣稱 Pokrovsk 同哈爾科夫州嘅庫皮揚斯克（Kupiansk）已被包圍，突顯克里姆林宮對奪取該城嘅重視。

另一方面，烏克蘭總統澤連斯基親赴前線視察，強調要將 Pokrovsk 打造成「堡壘城市」，延續巴赫穆特（Bakhmut）同阿夫迪夫卡（Avdiivka）式嘅「不退一步」精神。但喺烏克蘭國內，守城嘅決策引起強烈爭議。慈善組織「回家基金」（Come Back Alive）共同創辦人 Vitalii Deineha 批評：「如果唔盡快簽撤退令，我哋唔止會損失高士氣嘅傘兵同陸戰隊，連後方防線都會連環崩塌。再唔撤，前線個窿冇人補，後面嘅壕溝會比敵人一口吞晒。」

北部連接米爾諾赫拉德嘅補給走廊，只剩唔夠五公里，滿佈地雷同無人機。據一名烏軍營長透露：「最近幾次輪換，我哋步兵都要直接同俄軍短兵相接。啲路根本行唔到，就連無人地面車都過唔去。」然而，總司令史爾斯基仍堅持「唔退一步」嘅原則，加上層層上報虛報戰果，令上級誤判戰況Deineha 直言：「總參謀部每日報告越嚟越假。其實我哋基本上已經失咗 Pokrovsk，守 Myrnohrad 都冇意義。要講真話，盡快救返啲仲喺度等命令嘅士兵。」

為穩定民心，烏軍近期發動幾場「高調」行動。10 月 31 日夜間，據報由情報局長 Kyrylo Budanov 親自指揮，烏軍特種部隊乘 Black Hawk 直升機秘密降落 Pokrovsk 近郊。不過行動規模僅兩個排，對全局影響有限。11 月 6 日，「Skelia 突擊團」上傳影片，展示部隊喺市政廳頂升起烏克蘭國旗。呢個象徵性舉動證明市中心未完全陷落，但難以改變整體戰況，更似心理戰表演。