緬甸軍政府近日因中國、泰國等國際壓力，大舉掃蕩惡名昭彰嘅網絡詐騙基地「KK園區」，引發園內超過1500名人士蜂擁逃亡，跨過邊界湧入泰國。然而，呢場大規模掃蕩非但無阻止詐騙活動，反而引發區內黑市集團「搶人才」熱潮，各個詐騙團伙紛紛高調搶人，有園區仲大晒冷聲稱，月薪高達1400美元（約10900港元），一時吸引大量人士爭相報名應聘。

KK園區位於緬甸靠近泰國邊境嘅地帶，一直被視為東南亞詐騙活動嘅大本營。雖然園內不少工人係被誘騙、禁錮甚至強迫參與詐騙，但亦有人因高薪而自願投身其中。

法新社訪問一名中國籍男子，佢自稱係自願從事詐騙，10月23日親眼目睹幾百名從KK園區逃離嘅工人，居然即刻跑去距離僅3公里嘅另一個詐騙園區報到應徵，「嗰邊開出嘅人工係1400美元，去到有啲人就畀啲壞老闆拉走，有啲就成功跳槽，睇吓自己運氣點」。

根據泰國官方資料，上月底掃蕩期間，大約有1500名人士跨境走入泰國，涉及28個唔同國籍，包括500個印度人同200個菲律賓人。由於當中混合咗受害者同自願從業人士，當局坦言身份辨認工作難度極高。

另一方面，緬甸軍政府聲稱已派軍隊重奪KK園區內約200座建築物，並拘捕超過2000名懷疑詐騙人士。但外界普遍認為，今次所謂嘅掃蕩只係一場「做戲」，目的係回應國際社會嘅壓力，同時又唔會影響幕後龐大利益。

專家指出，KK園區原本人數達2萬，大部分係中國籍，成功逃去泰國嘅只係冰山一角。掃蕩行動後，更傳出當地武裝組織趁亂「撈油水」，將未離開嘅詐騙人員轉手賣畀其他詐騙團伙，據稱每名人員嘅「身價」高達7萬美元（約54.6萬港元）。

仍留喺園區嘅中國籍詐騙人員透露，每晚仲可以聽到附近傳嚟爆炸聲，但直言「淨係做騷」，並唔係真係打擊詐騙。人權團體「人口販運受害者支援公民社會網絡」代表Jay Kritiy直指，要徹底解決呢個問題，必須揪出幕後大佬，「將佢哋拘捕、起訴，再凍結晒佢哋所有資產，咁先叫真正打擊詐騙」。