YAHOO新聞報導，近日TVB節目《東張西望》踢爆有水貨客非法走私魚生入港，更影射貨品最終流入本港某大型壽司連鎖店，雖然報道未有直接點名，但香港人至愛嘅日本連鎖壽司品牌「壽司郎」母公司FOOD & LIFE Companies就立即發文駁斥報道失實，更聲稱將採取法律行動。

壽司郎母公司FOOD & LIFE Companies喺昨晚（3日）火速發表聲明，指《東張西望》相關報道「單憑片面資訊，毫無事實根據」，涉嫌影射並間接誹謗公司使用走私食材。聲明又指，報道內容已嚴重誤導公眾，影響公司聲譽，令市民產生疑慮，揚言會即刻採取法律行動追究到底。

事件源於《東張西望》節目指，自今年5月收到匿名舉報後，派出攝製隊進行長達數個月嘅深入追查，最終發現有水貨集團從內地非法運送魚生及海鮮返港，仲拍攝到貨物包裝上有「斑點鮭」等日式魚類標示字樣，懷疑部分問題食材已經流入本地知名連鎖壽司店。節目中更清楚拍到，一班水貨客喺粉嶺蓬瀛仙館附近一個環境極之惡劣嘅停車場交收，魚生嘅保鮮方法亦遠遠未達衛生標準。

FOOD & LIFE Companies嘅聲明中強調，公司所有食材均係透過指定嘅專業冷鏈物流公司入口及運送到各大分店，絕對唔存在使用非法渠道或走私食材嘅情況。而報道中出現嘅相片及人物，亦完全同公司及其物流供應商冇關聯，所有入口食材早已經完成正規嘅清關及檢驗程序。

另外，FOOD & LIFE Companies更指出，有人未經同意，懷疑私自拎走公司棄置嘅發泡膠箱作其他用途，公司已喺本月內特別提醒員工妥善處理垃圾，以防再惹誤會或引起不必要嘅猜測。聲明重申，香港壽司郎會繼續嚴格按照日本總公司嘅品質標準運作，確保所有食材及食具均符合香港衛生要求，務求令顧客食得安心、食得開心。

今次事件亦令市場即刻關注到TVB會否陷入一場與國際巨企嘅法律糾紛戰。市值龐大，規模大約係TVB 28倍嘅壽司郎母公司，顯然法務部門實力唔係講笑，對持續業績欠佳嘅TVB來講，潛在巨額賠償風險係不容忽視嘅問題。

翻查TVB最新業績報告，似乎唔使擔心公司會資不抵債。今年上半年，TVB嘅虧損規模已經收窄到約1.1億港元，本來更預計今年可以成功扭虧為盈，而EBITDA亦持續錄得按年改善。最重要嘅係，截至今年6月底，TVB手頭上仍有約8.69億港元嘅唔受限制銀行現金結餘，相當於大約172億日元，其中約38%（即3.33億港元）放咗喺中國內地及海外附屬公司，換言之TVB喺香港即時可動用嘅現金超過5億港元，睇嚟短期內應付訴訟或賠償風險仍然算係綽綽有餘。