《香港01》綜合內媒報導，中國多地地方政府要求當地居民集體抽血，聲稱係為咗建立及完善所謂嘅「國家DNA數據庫」，令好多居民感到不安，質疑政府做法係咪合理合法，更加擔心咁大規模採集DNA會造成個人資料洩露，嚴重影響到私隱安全。

據《問政四川》報道，平武縣龍安鎮雙安村嘅居民反映，近期每一戶家庭嘅男丁都收到通知，要求參與抽血，居民質疑今次嘅行動究竟係強制定係自願，質疑此舉係「無差別強制性採集」，更加令居民感到憤怒嘅係，當地早喺三年前已經試過一次類似嘅血液採樣。

對於居民嘅質疑，平武縣公安局喺10月28日透過官方平台作出回應，表示今次血液採樣係為咗進一步完善國家DNA數據庫，有助警方預防及打擊犯罪、維護社會穩定。公安局強調，抽血工作係依據《中華人民共和國刑事訴訟法》等相關法律法規進行，過程中會清楚向居民解釋抽血嘅目的、法律依據同信息保密規定。

當局聲稱，「若確有特殊情況或強烈顧慮，可及時與現場工作人員或村委會幹部溝通，我們將根據實際情況妥善處理」。警方亦承諾，所有抽取嘅血樣同個人資料都會嚴格保密，「確保信息數據的絕對安全，不會被洩露或用於非警務用途」。對於居民質疑三年前已經採過血樣，警方解釋指係因為當時嘅數據庫資料缺失或者樣本失真，先需要再一次核對採集。

無獨有偶，早前內蒙古錫林浩特市公安局亦都宣布由9月5日起，係全市範圍內集中採集男性居民嘅血液樣本，以建立本地DNA數據庫。根據錫林浩特市公安局9月20日嘅通告，轄區內所有男人要到戶籍所在地派出所接受採血，事件一經曝光，立即喺內地社交媒體上引起激烈討論，輿論強烈質疑公安局嘅做法根本冇法律依據。

《南方周末》報道指出，根據現行嘅《中華人民共和國居民身份證法》，登記資料僅限姓名、性別、民族、出生日期、戶籍地址、身份證號碼、相片同埋指紋等，完全冇提及DNA資訊。而《中華人民共和國護照法》同《普通護照同出入境通行證簽發管理辦法》，亦都冇任何規定話要採集居民嘅DNA資料。

報道進一步指出，公安部早喺2015年就曾經表態，雖然當時中國已經建成公安DNA數據庫同「打拐」專用嘅DNA庫，但明確表示將DNA納入戶籍資料管理係「時機未成熟」，因為涉及倫理同私隱問題，必須有法律嘅明確授權同社會共識。但去到2025年，中國嘅國家法律數據庫依然未見任何明確嘅立法，允許大規模採集民眾DNA。

《南方周末》亦提醒，DNA數據由於具高度敏感性、獨特性同遺傳特質，雖然係可靠嘅身份識別工具，但亦極易引發私隱洩漏同倫理爭議。因此，大規模採集DNA必須依法行政、程序透明，充分保障公民嘅私隱權利。資料顯示，內蒙古嘅錫林浩特係錫林郭勒盟嘅政治經濟文化中心，截至2024年底，全市常住人口約35.45萬，其中男性約18.33萬人。

清華大學法學院教授勞東燕近日喺微博上直指警方嘅做法完全冇法律依據，佢質疑：「地方公安機關集中採集居住地所有男性的DNA，哪有法律依據？《刑事訴訟法》是針對犯罪嫌疑人與刑事被告人的，莫不成是把居住地全體男性都當作犯罪嫌疑人與刑事被告人了麼？」佢又話：「我很奇怪，如此明顯且過分的違法行為，為什麼沒多少人出來反對？很多男性自己難道不應該出面反對一下嗎？不反對的話，下一次就輪到你自己被採集DNA了，覺得這也沒關係嗎？」