台灣中央社報導，日本新聞網（JNN）最新民調結果出爐，上個月先啱啱上任嘅首位日本女首相高市早苗，內閣支持率高達82%，係日本歷史上新內閣民調中，僅次於2001年小泉純一郎內閣嘅88%。高市早苗喺國際場合大展「關西式」親切外交，被日本網友封為「浪花大嬸」，成功打破日本政客一貫嚴肅拘謹嘅刻板形象，引起網絡熱烈討論。

為咗避免調查結果過份集中網絡用戶，令到數據有偏差，日本新聞網特別喺11月1日至2日，以電腦隨機抽選號碼方式，由調查員親自透過家用電話同手機訪問咗全日本2607位18歲或以上嘅男女，最後有效回答人數有1013人，有效回覆率為38.9%。

調查顯示，高市內閣嘅支持率高達82.0%，相比上個月石破茂內閣嘅支持率，一口氣激增咗38.3個百分點。唔支持高市內閣嘅只有14.3%。而對自民黨與日本維新會組成聯合政府，有52%受訪者表示正面支持。

高市早苗喺就職演講入面明確指出，未來將採取「負責任嘅積極財政」方針，策略性運用財政資源推動經濟。當受訪者被問到認為喺高市政權之下，日本景氣會唔會好轉時，有58%受訪者認為「會好轉」，只有23%嘅受訪者認為「唔會好轉」。

另外，高市早苗日前表示，日本國防開支將提早兩年、喺2027年度增加至相當於國內生產總值（GDP）嘅2%。對此政策，表示支持嘅受訪者有56%，反對嘅則有33%。

至於政府現時正熱烈討論嘅物價紓緩措施之中，受訪者最期待嘅第一位係「食品消費稅歸零」，其次係「降低現役世代嘅社會保險費」。

高市早苗自上任後喺外交舞台頻頻搶鏡，尤其係日前首次與美國總統特朗普（川普）見面，成功贏得日本國內外一致好評。調查顯示，有高達83%受訪者肯定高市喺外交上嘅表現。日本專家及民間團體都一致認為，高市早苗呢種親切、爽朗嘅互動方式，唔單止徹底打破過去日本政客固有嘅嚴肅同距離感，更係將關西人嗰種特有嘅「人情味」成功帶到國際舞台。

高市早苗出身奈良，年輕時喺神戶大學讀書，學生時期經常走訪大阪同京都，長期受關西地區嘅文化薰陶，性格開朗活潑。成為首相後，呢種關西特質更係完全表露無遺。

網上更有唔少日本網友笑言，高市首相嘅風格根本就係「浪花大嬸」（ナニワのおばちゃん，ナニワ係大阪古稱）翻版，相關評論喺網絡上贏得大量讚好同熱議。網友更紛紛留言表示：「如果特朗普識講大阪腔一定超搞笑」、「大阪人同紐約人嘅節奏感肯定夾到絕」、「睇新聞睇到覺得高市首相真係似足關西大嬸！」

高市早苗日前出席韓國慶州舉行嘅亞太經濟合作會議（APEC），除咗俾媒體捕捉到佢用「滑椅仔」接近印尼總統普拉伯沃（Prabowo Subianto）之外，佢同智利總統波里奇（Gabriel Boric）之間嘅親密互動亦成為全場焦點。

波里奇更特意喺X（前Twitter）貼出同高市嘅互動短片，恭喜佢成為日本史上首位女首相。片中見到高市搭住波里奇嘅膊頭，兩人交頭接耳講得非常投契，互動親密到似認識咗好多年嘅老友一樣。有網友搞笑留言：「呢個親密程度完全係『關西大嬸』嘅級數，夠晒地道！」