中國商務部國際貿易談判代表兼副部長李成鋼今日喺國務院新聞辦公室嘅例行吹風會上表示，中國稀土出口管制措施嘅重點係安全問題，因為「抓好安全才能有更好的發展；更好的發展才能保障更強大的安全」。

內媒《財聯社》及《證券時報》今日（31日）報道，國新辦例行吹風會期間，有外國傳媒記者提問，指稀土開採過程涉及高度污染同高風險，質疑中國近期推出嘅稀土出口管制措施，究竟會點影響中國嘅綠色科技外貿產品出口以及綠色發展。對此，李成鋼回應強調，出口管制措施嘅核心其實係安全問題，而「綠色發展」係一種理念，本質係聚焦喺安全同發展之間嘅關係：「簡單嚟講，就係抓好安全，先可以有更好嘅發展；有更好嘅發展，先可以保障更加強大嘅安全。」

李成鋼亦指出，綠色轉型係全球經濟重要嘅發展趨勢同增長引擎，國際社會近年嚟高度關注。但呢個領域都同時面對單邊主義同貿易保護主義嘅挑戰，中國一直秉持開放合作嘅態度，積極參與全球綠色治理。

李成鋼進一步表示，中國將從三個方面落力推動綠色貿易發展，為相關產業營造更良好嘅國際環境：深度參與綠色貿易嘅全球治理；持續提升高標準自由貿易區網絡嘅「綠色含量」，例如中國－東盟（東協）自由貿易區3.0議定書當中，特別加入咗綠色經濟專章；深化國內改革，加強同國際綠色標準接軌。

另一方面，中美經貿問題昨日亦有新進展。美國總統特朗普（Donald Trump）同中國國家主席習近平尋日喺南韓釜山會晤，傾咗一系列經貿議題。中國商務部隨後公佈，中美雙方經貿團隊喺馬來西亞吉隆坡舉行嘅磋商中，達成咗暫緩實施本月9日所公佈嘅部分稀土相關出口管制措施一年。

華府智庫「捍衛民主基金會」（FDD）中國事務高級研究員辛格頓（Craig Singleton）指出，今次協議嘅模式同過去一年無異，只係「將短期穩定包裝成戰略進展」。佢認為，雙方正嘗試維持微妙嘅合作平衡，避免危機爆發，但底層嘅戰略對抗依舊存在。