台灣自由時報引述法新社報導，挪威首都奧斯陸嘅公共交通營運商Ruter日前爆出，有來自中國嘅電動巴士存在嚴重保安漏洞，可能容許生產商甚至惡意黑客遠距離操控車輛，引發安全憂慮。

奧斯陸交通營運商Ruter喺今年夏季測試咗兩架新型電動巴士，一架係中國「宇通客車」生產，另一架就由荷蘭VDL集團製造。結果發現，中國製巴士配備咗一張內置SIM卡，可以畀製造商遙距更新軟件，正因咁而存在安全隱患；相反，荷蘭製造嘅巴士就無呢種功能。

Ruter行政總監詹森（Bernt Reitan Jenssen）接受挪威公共廣播公司NRK訪問時強調：「我哋發現，任何可以連上網嘅設備都存在一定嘅風險，當然巴士亦唔例外。」「風險唔單止係製造商可以取得控制權，仲可能有其他不法分子透過入侵供應鏈，影響巴士嘅正常運作。」現時Ruter正緊急建立數碼防火牆，加強保安措施，避免類似事件再度發生。

對此，挪威政府亦表示高度關注，正對事件展開調查。交通部長納加德（Jon-Ivar Nygard）向NRK強調，政府會徹底評估使用來自「與挪威並無安全合作關係」國家嘅巴士，可能帶來嘅潛在安全風險。法新社曾就事件聯絡宇通客車公司，但至今未獲回應。

資料顯示，宇通客車公司前身為鄭州客車廠，係中國大型企業之一，主要從事客車產品嘅研發、生產同銷售，連續多年穩坐中國客車產銷榜首，全球市場佔有率接近13%，被視為國際市場上重要嘅客車供應商。Ruter目前喺奧斯陸同周邊地區大約營運緊300架中國製電動巴士，但暫時仍未清楚呢批巴士會唔會有相同嘅安全漏洞，情況有待進一步調查。