特朗普政府正對負責執行驅逐出境計劃，嘅移民及海關執法局（ICE）進行重大改組，預料全國至少一半高層領導將被重新任命。

消息指，國土安全部發起今次調動，涉及 12 名 ICE 外地辦事處主任，佢哋主要負責管理全國移民執法網絡。當中一半職位會由海關及邊境保護局（CBP）人員接任，另一半則由 ICE 官員內部調任。雖然未有公布具體受影響城市，但官員指出芝加哥、洛杉磯同華盛頓都屬主要移民執法重點地區。

據了解，ICE 領導層同白宮官員已討論呢次變動多時，今次調任加埋退休同其他調動，實際上影響到該機構約一半外勤高層人員。特朗普政府自上任以嚟，多次強調要加強國內執法行動，近期亦喺多個城市展開大規模拘捕行動，引起民眾特別係移民社區嘅不安。

外界認為，今次改組反映 CBP 與 ICE 嘅整合會更加緊密，特別喺 CBP 被指採用高壓手段之際，邊境巡邏人員將更直接參與城市移民執法工作。CBP 官員喺洛杉磯同芝加哥曾主導多次備受爭議嘅突襲行動，包括直升機繩降入屋拘捕、甚至喺行駛中卡車上跳落追人。

根據資料，負責洛杉磯及芝加哥行動嘅邊境巡邏負責人格博維諾（Gregory Bovino）亦因涉嫌向示威者投擲催淚彈而面臨聯邦訴訟。佢周二出庭作證，案件涉及聯邦官員是否在芝加哥使用過度武力。

ICE 官方表示，特工主要執行「有針對性嘅行動」，通常要花數小時監控目標人士。今次係特朗普任內 ICE 第三次人事變動，顯示該局喺總統移民政策中嘅關鍵角色。今年二月，代理局長維泰洛（Caleb Vitello）被調任其他職務，由萊昂斯（Todd Lyons）接任代理局長。五月，該局再調動兩名主要分部高層。

國土安全部發言人麥克勞克林（Tricia McLaughlin）表示，部門「專注於成果，並會達成成果」。佢形容：「呢係一支團隊，一場戰鬥。」強調由國土安全部長諾姆（Kristi Noem）領導嘅團隊，會執行特朗普總統推動嘅移民驅逐政策。

白宮發言人傑克遜（Abigail Jackson）則喺聲明中指：「總統嘅團隊正齊心協力，從確保邊境安全到驅逐非法移民罪犯，成果顯而易見。」

今次改組發生之際，美國多地嘅執法行動引發爭議。八月，洛杉磯一批邊境巡邏特工從租用卡車突襲 Home Depot 停車場，拘捕十多人；十月，芝加哥又發生邊境巡邏特工向一名婦女連開五槍事件，進一步突顯執法手段激進。

據悉，白宮對 ICE 每日逮捕數字未達預期感到不滿，計劃批准更多由 CBP 官員接任 ICE 領導職位。「CBP 會按指示行事，而政府認為 ICE 未完成任務，」一名國土安全部官員透露。

外界預期，特朗普政府將藉此加速全國驅逐行動，進一步改變美國移民政策嘅執行格局。不過批評者擔心，呢種整合可能加劇社區緊張，並引發更多法律挑戰。