國務院總理李強同志今日喺人民日報寫文，講「十五五」嗰陣時嘅經濟社會發展規劃。佢話，「做好國內大循環絕對唔係話唔要國際循環」，要快啲形成更有競爭力同埋安全韌性嘅國內國際雙循環。

中共二十屆四中全會早幾日通過咗《中共中央關於制定國民經濟和社會發展第十五個五年規劃嘅建議》，國務院就會跟住呢個嚟制定「十五五」規劃綱要。

講到外邊環境，李強同志喺篇文度話，十五五嗰幾年，全球政治經濟個局勢會繼續經歷大執位、大分化、大重組，多咗好多唔肯定、難估計嘅嘢，但世界多極化、經濟全球化個大趨勢就扭轉唔到嘅，中國發展面對嘅戰略機遇同埋風險挑戰係同時存在嘅。

佢話，做好國內大循環絕對唔係話唔要國際循環，要用多啲方法去開拓國際循環，加強國內國際兩個市場兩種資源嘅聯動效果，快啲形成更有競爭力同埋安全韌性嘅國內國際雙循環。

喺科技創新嗰方面，李強同志話，要統一推動教育科技人才一齊發展，搞好國家創新體系，喺加強原始創新同埋關鍵核心技術攻關度持續發力，快啲實現高水平嘅科技自立自強。

過去幾年，中國喺新能源車等等嗰啲領域嘅產能過剩已經變咗一個死症。李強同志喺篇文入面無特別提到呢個問題，但就話，要留意，發展新質生產力需要有一定嘅本身條件，要堅持科學理性、因地制宜，發揮比較優勢去推動新質生產力發展。

佢強調要更好咁兼顧發展同安全，用新安全格局去確保新發展格局。要全面諗晒內部同外部嘅風險挑戰，死死實實咁守住唔會發生系統性風險嘅底線。

官方啲文一如既往，三言兩語講晒嘅嘢點都要長篇大論，搞到睇唔明。其實中國經濟個關鍵就唔係睇政府做啲乜，而係睇政府唔做啲乜。少干預、減稅同開支，人民手上有錢夠膽使，經濟自然有起色。所謂「無招勝有招」，政府越想做嘢通常越適得其反。

但畢竟「再苦不能苦老爺」，上述右派經濟作為，中央係無可能做嘅，黨如人民父母，自然要「全方位」照顧人民。所以無論中央點樣講點樣做，經濟都唔會改善。