Yahoo 新聞報道，網台主持「傑斯」尹耀昇，早前被港府以洗黑錢罪及串謀作具意圖煽動行為罪判囚32個月，2022年11月刑滿出獄，翌年前往加拿大。經過接近兩年半審批，佢近日喺YouTube頻道宣佈，已正式獲加拿大政府批出政治庇護，目前進入申請永久居留權嘅階段。

尹耀昇喺10月28日上載新片，講述整個申請過程。佢指自己喺2023年3月抵達加拿大，但因為喺香港曾被判洗黑錢罪成，起初遭加拿大拒絕以旅客身份入境，被迫滯留台灣一段時間。最終靠加拿大國會議員出面解釋、以「特事特辦」形式處理，先至成功入境。佢形容，呢次庇護申請係「極度棘手」，從頭到尾都充滿不確定性，「我喺香港畀人套咗個洗黑錢罪名，簡直係惡夢同詛咒。」

傑斯提到，加拿大移民局曾明言洗黑錢罪喺當地可判監十年，因此喺申請過程中唔少朋友都勸佢避重就輕，唔好主動提起案底。不過佢選擇坦白面對：「講真話會舒服啲。」佢表示，自己唔想用包裝去求庇護，希望加拿大政府真正了解佢個案嘅性質：「如果你哋收留我，希望我安身立命，就要搞清楚，我唔係一個真洗黑錢嘅罪犯。如果你審視咗仍然覺得我係罪犯，你掟返我走都冇問題。」

尹耀昇透露，最初由加拿大移民局負責處理個案，但喺半年前邊境服務局（CBSA）決定介入，理由係佢有刑事案底，要求召開聽證會。聆訊於10月28日舉行，由朝早9點半開到下午，過程中佢要再次陳述被捕同受審經過，情緒一度崩潰，「喊咗好多次」。最終移民官當場宣佈批准佢嘅政治庇護申請，意味佢正式獲得加拿大庇護身份，可進一步申請永久居留。

傑斯憶述，移民官喺聽證會上指出，加拿大政府唔認同香港政府當年以洗黑錢罪名控告佢，認為佢當時眾籌係為協助年輕抗爭者。佢翻譯判詞內容時說：「正如聯合國專家指出，獲取資金與資源嘅能力，係結社自由不可或缺同極為重要嘅一部份。」聽到裁決一刻，佢坦言情緒激動：「最大嘅釋懷係加拿大判斷我唔係洗黑錢。」佢感謝加拿大政府「收留」佢，表示會努力回饋當地社會。

尹耀昇特別感謝一路幫助佢嘅人士，包括律師團隊、台灣長老教會、溫哥華支聯會、國際特赦組織，以及為佢發聲嘅加拿大國會議員。「呢段路行得辛苦，但終於有一個結果，我好感恩，加拿大畀咗我一個新開始。」