美國軍方近排擴大喺拉丁美洲嘅軍事部署，表面聲稱係「打擊販毒」，但行動規模異常地龐大，惹嚟各方揣測。路透社獨家爆料，有份參與呢啲拉美任務嘅國防部官員，竟然被要求簽署額外嘅「保密協議」，做法極唔尋常。呢個舉動，加上「福特號(USS Gerald R. Ford)」航母戰鬥群進駐，令外界，尤其係委內瑞拉，更加擔心美國可能係部署緊軍事入侵行動，局勢一觸即發。

據三位匿名美國官員向路透社透露，呢次要求部分參與拉美任務嘅軍方人員簽署保密協議，係極之罕見嘅舉動，尤其係牽涉海外軍事行動嗰陣。軍人本身已經受國家安全保密條例所規管，加簽額外協議，進一步引發外界對行動真正目的嘅廣泛質疑。消息人士未有透露究竟有幾多國防部人員被要求簽署，亦冇詳述協議嘅具體範圍。

自九月頭以嚟，美軍喺加勒比海地區已發動咗至少 13 次打擊懷疑運毒船隻嘅行動，造成約 57 人死亡。美國國防部承認，部分死者來自委內瑞拉、哥倫比亞同厄瓜多爾。不過，令人生疑嘅係，上星期五角大廈宣佈，會將「福特號」航空母艦打擊群派去拉丁美洲，令喺區內執行任務嘅美軍兵力總數超過 1.6 萬人，仲包括導彈驅逐艦、F-35 戰機同核潛艇。專家普遍指出，呢個軍力部署規模遠超傳統「禁毒行動」所需嘅火力，五角大廈至今都未有解釋，點解區區「緝毒」需要用到咁大規模嘅重型武器。

呢次嘅保密協議，國防部長赫格塞斯（Pete Hegseth）上任後，一系列嚴格控制資訊流通措施嘅最新部署。自今年一月上任以嚟，赫格塞斯已經採取咗好多手段收緊對外資訊。例如，佢喺十月十五日發出備忘錄，要求五角大廈職員喺同國會議員互動之前，必須事先攞到批准。佢亦展開咗多宗洩密調查，甚至要求駐五角大廈嘅記者簽署新嘅採訪政策，唔簽嘅記者就會被取消採訪證。

有國會議員表示，佢哋對今次拉美任務嘅關鍵細節係一無所知，感覺被蒙在鼓裡。同總統特朗普關係密切嘅資深共和黨參議員古藍（Lindsey Graham），喺電視節目上暗示，特朗普好快會向國會交代「針對委內瑞拉同哥倫比亞嘅未來潛在軍事行動」。古藍聲稱，呢啲軍事部署係用嚟對付「透過大量輸入毒品危害美國人民」嘅國家。雖然佢希望委內瑞拉總統馬杜羅（Nicolás Maduro）可以和平落台，但又拋出一句「佢恐怕來日無多」，言詞間充滿火藥味，惹人揣測。

特朗普政府一直將委內瑞拉同哥倫比亞政府同毒品貿易直接掛鉤，儘管兩國都否認呢啲指控。由於美軍兵力快速集結，委內瑞拉政府對此高度警惕，警告美軍行動部署，極有可能係為軍事入侵行動做前奏。呢次額外要求官員簽署保密協議，更加深咗外界嘅疑慮，擔心美國嘅軍事干預行動可能隨時升級。