美國總統特朗普創立嘅社交平台「Truth Social（真實社群）」宣布，將新增「現實世界下注功能」，容許用戶就政治、經濟、體育、娛樂等議題下注，正式進軍被稱為「預測市場」（prediction markets）嘅新興賭注行業。

法新社報道，特朗普媒體與科技集團（Trump Media and Technology Group，簡稱TMTG）希望趁住美國年輕用戶熱衷手機下注嘅潮流，打入快速增長嘅市場。根據官方聲明，Truth Social將會同Crypto.com合作，用戶可針對「美國大選結果、利率同通脹變化、黃金同原油價格」等金融議題下注；亦可以投注「NFL、NBA、MLB等各大職業聯盟賽事」結果。

呢類平台不被聯邦當局視為傳統賭博，而係歸類為「預測市場」，因此由美國商品期貨交易委員會（CFTC）監管，而唔受州政府博彩監管機構（例如彩券局或賭場委員會）限制。用戶下注方式類似買入「事件合約」嘅金融產品——只要事件結果發生，例如某候選人勝出大選、或某支球隊奪冠，就能獲利。

預測市場被視為具爆炸性潛力嘅新興產業。本月初，紐約證券交易所母公司「洲際交易所集團」（Intercontinental Exchange）就斥資20億美元入股知名平台Polymarket，顯示傳統金融巨頭亦已入場。呢類應用特別受年輕成年用戶歡迎，但外界亦擔心容易引發「下注成癮」同「財務風險」問題。特朗普媒體集團曾多次嘗試開拓新收入來源，包括推出加密貨幣產品同串流影音平台，但成績平平。根據美國證券交易委員會（SEC）文件顯示，TMTG今年上半年營收僅得170萬美元，淨虧損高達5170萬美元。

據《彭博》報道，特朗普長子小特朗普（Donald Trump Jr.）係TMTG董事會成員，早前曾出任兩大預測市場平台——Kalshi同Polymarket——嘅顧問，而佢合作嘅投資公司「1789 Capital」亦持有Polymarket股份。外界認為，「Truth Predict」有機會同呢啲平台形成直接競爭關係，令預測市場生態更加白熱化。

報道指出，「Truth Predict」將依賴加密貨幣交易平台Crypto.com旗下嘅「Crypto.com Derivatives North America」作為後台技術支撐，用戶可以以加密貨幣進行預測投注。TMTG喺今年較早前，已經同Crypto.com以及一間特殊目的收購公司（SPAC）達成合作協議，成立一家加密資產管理公司。專門購買同持有由Crypto.com支持嘅CRO代幣。呢步棋意味特朗普陣營正試圖建立一條「政治 × 金融 × 區塊鏈」嘅生態鏈。Truth Social官方聲明透露，該服務喺美國完成測試後將全面上線，之後會推廣至全球市場。除咗政治同經濟事件外，平台亦會提供商品價格、職業體育聯盟賽事等各類投注項目。

Crypto.com行政總裁馬斯札雷克（Chris Marszalek）近年與特朗普關係密切。據報佢喺特朗普勝選後係首批到訪佛州海湖莊園（Mar-a-Lago）拜訪嘅加密貨幣業界高層之一。Crypto.com早前更向特朗普嘅就職委員會捐贈100萬美元，之後再向佢領導嘅超級政治行動委員會MAGA（Make America Great Again）捐出1000萬美元，被視為特朗普陣營最重要嘅加密金主之一。業界人士指出，呢段關係對特朗普媒體嘅加密業務推進至關重要，尤其喺未來數月特朗普計劃推動一系列區塊鏈政策之際，Crypto.com嘅角色或將更吃重。

不過，《彭博》同時指出，預測市場雖然人氣急升，但喺美國依然存在監管灰區。部分州政府仍然將體育賽事結果預測視為賭博活動，需要接受嚴格監管。目前，全美仍有十多個州禁止體育博彩，因此「Truth Predict」能否順利擴張，仍取決於未來CFTC（美國商品期貨交易委員會）同各州監管機構之間嘅法律博弈。