莫迪缺席喺馬來西亞吉隆坡舉行嘅東協峰會，引起國際社會對印美關係嘅各種揣測。美國總統特朗普親身出席，莫迪竟然選擇「缺席」，被外界視為印美關稅談判陷入僵局嘅信號，尤其係印度持續從俄羅斯入口石油嘅情況下，隨住美國加推對俄羅斯新一輪制裁，印度嘅經濟情況變得不樂觀。

莫迪發文話，佢會以「線上方式」參與峰會，並特別提到同馬來西亞總理安華嘅「友好關係」，又重申會推動東協同印度嘅戰略夥伴關係。不過，佢無講明點解唔親身出席，只話要慶祝排燈節（Diwali）。

安華就話，莫迪因為印度國內正值排燈節高峰期，所以改為視像出席。呢個理由表面合理，但冇平息外界嘅質疑。畢竟，莫迪過去多次都喺節日期間兼顧國際行程。今次峰會恰逢特朗普亞洲行首站，佢喺吉隆坡會晤中國國家主席習近平，仲出席多場雙邊會談，令整個峰會星味十足。

特朗普喺白宮舉行排燈節活動時提到，佢同莫迪「有好嘅對話」，仲話印度會「逐步停止」購買俄油。「我哋關係非常好，佢哋已經減少從俄羅斯買油，仲會繼續減。」特朗普話。莫迪其後感謝特朗普嘅節日問候，但無正面回應有關石油或關稅問題。

印度國內反對派就唔放過機會。國大黨領袖拉梅什（Jairam Ramesh）狠批莫迪：「同特朗普走得太近，風險好大。」佢指出，特朗普多次喺公開場合講「阻止咗印巴戰爭」，呢啲言論反而令莫迪尷尬。甘地（Rahul Gandhi）更直言：「莫迪驚特朗普。」認為莫迪任由美國總統替印度講政策，反映印度外交自主性受損。

回顧年初，莫迪同特朗普喺白宮熱情擁抱，當時外界以為兩人會延續昔日「好兄弟」關係。不過，特朗普政府新一輪關稅政策波及印度，鋼鐵、紡織等出口產品被課25%懲罰性關稅，令印度企業叫苦連天。八月時，美方再指印度購買俄油等於資助莫斯科戰爭機器，稅率再加至50%，印美關係急速降溫。

同時，美國財長貝森特宣布制裁俄羅斯石油公司（Rosneft）同盧克石油公司（Lukoil），並警告外國銀行若同佢哋交易會面臨次級制裁。呢項措施令印度煉油廠進退維谷，因為俄油長期係印度最大進口來源。分析指，制裁實際影響要睇美方執行力度，但油價已升咗5%。

印度外交部強調，會以「能源獨立」為首要考慮，並同美方保持溝通。不過，能源分析師裡托利亞（Sumit Ritolia）就話，印度短期內唔可能完全停買俄油。數據顯示，印度自2021年起俄油進口量激增近19倍，俄羅斯早已成為印度最大原油供應國。現時莫迪政府正面對兩難：一邊要顧及與俄羅斯嘅長期合作，另一邊又唔想激怒美國。

莫迪缺席東協峰會，表面係節日理由，實際卻可能係避免與特朗普「握手言歡」嘅政治算盤。呢場外交「玩失蹤」事件，反映印度喺大國博弈之間進退維艱。隨住11月制裁期限逼近，印美關係未來點走，將直接牽動全球能源市場同亞洲地緣政治格局。