日本近日熊蹤頻現，連香港人熱門旅遊熱點都「唔安全」。報道指，喺京都府內，尤其係遊客常去嘅地區，出現多宗熊出沒報告，令人警惕。據《讀賣新聞》報導，京都府警喺兩日內接獲 5 宗 有關熊或疑似熊出現嘅報案，涵蓋右京區住宅區同景點區域。雖然暫時未有市民受傷，但警方已經叫大家提高警覺。

根據警方紀錄：上星期五（24 日）上午大約6時15分，喺右京區太秦中山町鄰近一片竹林，有人發現兩隻幼熊。當日下午4時45分，賞月名勝「廣澤池」東側鳴瀧音斗山町其中一間民居內亦有熊蹤。晚上11時10分，喺廣澤池西側、嵯峨大澤落久保町嘅田間，有兩隻形似熊嘅動物出沒。

到咗上星期六（25 日）凌晨0時50分左右，喺JR 嵯峨嵐山站以西大約800米、嵯峨野野宮町嘅道路上，發現一隻似幼熊嘅動物——位置係世界遺產「天龍寺」以北，同熱門旅遊點「嵐山竹林小徑」旁邊。大約一個半鐘後，喺鳴瀧音斗山町附近一處民居內，再次有熊蹤出没。兩宗事件中，熊均未與人直接接觸，亦冇人受傷。因應以上五宗報案，右京警察局已經加強巡邏，並呼籲市民「見到熊唔好靠近，要即刻通知警方」。

另一方面，日本亦有寵物疑被熊襲走事件。上星期日（26 日），喺岩手縣住田町一處住宅內，早上6時起床後，屋主發現繫喺戶外庭院嘅一隻柴犬失蹤。現場有拖曳痕跡。獵人協會接報後，在附近山上發現熊嘅足跡、柴犬項圈同鏈繩，但截至目前仍未找到柴犬同熊。該柴犬長大約70至80厘米，拖曳痕一路延伸入山深處。飼主表示，凌晨3時左右曾聽到唔尋常嘅狗叫聲；雖然附近山區熊蹤常見，但最近幾日無人目擊。柴犬失蹤後，當地正考慮設置陷阱留意。

此前，同樣嚟自宮城縣大崎市一戶人家，上星期六（25 日）上午9時30分左右，其飼養喺庭院內嘅一隻約50厘米長柴犬，疑被一隻約80厘米長野熊整隻叼走，庭院只剩下項圈同狗繩。

日本今年熊襲事件嚴重：造成至少 10 死、逾百人受傷，其中秋田縣就有 54 人受傷，本月單計 34 人遭熊襲。秋田縣知事鈴木健太表示，現況已經超出縣、市、町村單位可應付嘅範圍，故請求自衛隊出動。綜合日本媒體報導，秋田縣今年熊頻繁出現，共計 8,044 宗，係去年全年嘅 6 倍。10 月更急劇上升，本月已高達 4,154 宗目擊，造成 2 死、54 傷。鈴木健太稱，縣內範圍連續發生熊對人造成傷害事件，情況極為嚴重，已向防衛省正式提出請求。

鈴木在社交媒體指出，地方政府現時正繼續調度箱形捕熊陷阱，並確保學生上學安全、派發防熊噴霧等；但人手已逼近極限疲憊。他決定借新內閣上任時機，親自向防衛大臣提出。鈴木坦言，若動用自衛隊驅除熊，現行法例未有明確規定，故無法按一般災害派遣程序處理。