中共二十屆四中全會喺北京召開，除咗制定未來五年經濟發展規劃之外，高層人事調整成為外界焦點。鑑於最近包括前中央軍委副主席何衛東、軍委政治工作部主任苗華等多名軍方高官被開除黨籍同軍籍，路透社分析認為，今次全會可能係自2017年以嚟人事變動幅度最大嘅一次。當年十八屆七中全會一口氣開除咗11名中央委員，創下紀錄。今次預計至少替換11名中央委員同候補委員，涉及軍界、地方同中央官員，權力版圖正悄悄重塑。

軍中人事調整尤其惹人注目。上週五，官方宣佈開除前中央軍委副主席何衛東嘅黨籍同軍籍，標誌住中國數十年以嚟最大規模嘅軍中人事洗牌。何衛東曾任東部戰區司令員，2022年晉升為中央軍委副主席，亦係政治局24名委員之一。佢嘅落馬令中央軍委七人領導班子入面，自2023年以嚟已有三人因反腐調查離職，包括前國防部長李尚福同苗華。

布魯金斯學會學者 Jon Czin 分析指，習近平可能會喺現有軍委委員中提拔一人補副主席空缺，例如聯合參謀部參謀長劉振立或者軍委紀檢書記張升民。如果真係咁，軍委將再出現新空缺，可能由戰區司令級高官補位。另一個可能性係，習近平直接提拔戰區司令做副主席，好似當年提拔何衛東一樣。若新任副主席進入政治局，就可能接替佢嘅政治局席位。

另外，軍委後勤保障部部長張林因「涉嫌嚴重違紀違法」被全國人大除名，幾乎可以肯定被開除黨籍。據報道，至少十幾名解放軍高級官員已經數月冇公開露面，極可能正接受調查。新加坡南洋理工大學助理教授 James Char 認為，部分次級調查結果可能稍後先公佈，以免分散全會焦點，亦避免打擊軍心。

除軍方外，中央委員替換都喺進行中。前海關總署署長於建華去年12月去世，前山西省省長金湘軍本月因貪腐被開除黨籍，前農業部長唐仁健去年11月亦因貪腐被開除，呢三人幾乎肯定被替換。自今年4月起，仲有四名中央委員因涉嫌貪腐接受調查，包括前廣西主席藍天立、前內蒙古主席王莉霞、前證監會主席易會滿同金湘軍。若調查結束，開除黨籍嘅決定可能喺本次全會公佈。黨內紀檢審查通常需時半年或更長。

地方同中央層面嘅變動亦備受關注。前工信部長金壯龍自去年12月起冇公開露面，今年2月被免職，但未確認是否接受調查。前中聯部長劉建超亦傳被查，8月有媒體報導指佢7月底出訪返京後被帶走問話，疑涉貪。9月30日，中聯部官網顯示，劉建超已被瀏海星取代。根據公開資料，今年以嚟因調查、調整或退休等原因，至少有11名省部級官員獲新任命。例如中央政治局委員馬興瑞7月被免去新疆黨委書記職務，官方稱其「另有任用」，但新職至今未明。

呢波罕見嘅大規模人事變動被視為為2027年二十一大甚至更早嘅換屆做準備，目的係為下任領導班子鋪路，確保人選能進入中央委員會或政治局。分析人士認為，習近平正透過反腐同人事調整進一步鞏固權力，重塑軍政高層結構，以應對內外挑戰。