白羅斯（Belarus）一名26歲歌手，飛去泰國應徵模特兒工作，點知竟被拐入緬甸詐騙園區，仲因「業績唔達標」慘被摘器官殺害，遺體再被火化。更離譜嘅係，詐騙集團事後仲勒索佢家屬，要對方交出50萬美元（約合389萬港元）贖金。依家，家屬正努力協調，希望將佢骨灰運返祖國安葬。

據《The Voice Mag》報道，呢名不幸遇害嘅女子叫薇拉‧卡拉夫佐娃（Vera Kravtsova），出身自白羅斯首都明斯克。佢係一名歌手兼模特兒，曾參加當地版《好聲音》節目（The Voice），但亦有講法指，佢只係喺明斯克一間夜店表演時，啱啱企喺個模仿節目風格嘅活動背板前影相。

薇拉早前喺網上見到一份「泰國模特兒招聘廣告」，覺得係個好機會，於是即刻飛去曼谷面試。點知去到之後就被人轉送去緬甸仰光，被困喺詐騙園區入面。其實薇拉唔係第一次出國，生前經常四圍旅遊，足跡遍及中國、越南、峇里島等地，係個熱愛生活嘅年輕女仔。

報道指出，薇拉喺9月20日由曼谷飛去仰光，之後就被困喺園區入面，被逼參與網上詐騙。佢每日要喺交友網站上同男人調情，再慢慢引誘對方投資「高回報項目」，以此呃錢。但薇拉「業績」唔達標，最終被園區老闆賣去摘器官，遺體再被焚化。

據悉，薇拉喺10月4日開始失聯，唔久之後，家人接到匿名電話，有人聲稱掌握薇拉嘅消息，要求家屬交出50萬美元贖金，否則永遠見唔到佢。家屬震驚報警，但幾日後，再收到對方通知薇拉已經被賣去摘器官，遺體已經火化。聽到呢個消息，家人即時崩潰。

根據最新消息，薇拉嘅母親經過多次交涉，終於成功說服詐騙集團免費交出骨灰，預計近期親自飛去緬甸處理後事。白羅斯外交部亦證實事件，表示會提供外交支援，確保家屬能夠安全完成相關程序。

雖然中國、泰國近年不斷合作打擊詐騙園區，但情況依然嚴峻。根據衛星圖像同無人機影片顯示，緬甸邊境多個詐騙園區仍然活躍，規模仲愈嚟愈大，甚至用上全球首富馬斯克（Elon Musk）旗下「星鏈」（Starlink）衛星網絡作為通訊工具，令執法機構更加難以監控。

專家指出，呢啲詐騙園區主要由中國犯罪集團聯同緬甸民兵組織經營。今年2月，中泰緬三方政府曾向民兵施壓，要求清除園區，當時約有7000人被救出。不過，泰國一名高級警官透露，仍有多達10萬人被困喺園區內，部分甚至每日被毆打、餓飯、逼做詐騙。

打擊行動開始僅幾個星期，園區就重新擴建。9月拍攝嘅衛星圖像顯示，位於緬甸妙瓦底地區嘅27個詐騙園區，有大量新起嘅辦公樓同宿舍大廈。當中最大型嘅「KK園區」，喺短短7個月內就新增一整個區域，主要入口安檢站大幅擴建，仲起咗新道路同通道。

位於泰緬邊界嘅莫艾河（Moei River）亦出現至少5個新渡口，用嚟由泰國偷運物資入園區。泰國政府曾切斷電力同網絡連線，但好快園區屋頂就鋪滿星鏈接收器。僅KK園區一幢大樓嘅屋頂，就拍到近80個星鏈天線。

星鏈喺緬甸根本無營運執照。今年2月之前，星鏈流量少到連緬甸網絡供應商名單都上唔到。不過根據亞太網絡資訊中心數據，7月3日至10月1日期間，星鏈喺緬甸每日流量竟然高居榜首。美國加州檢察官早喺去年就曾警告馬斯克公司，指星鏈衛星系統正被詐騙集團濫用，但星鏈一直無作任何回應。