陝西省安康市近日爆出一宗駭人食安醜聞，一間滷味店為咗谷生意，竟然喺滷汁入面加罌粟殼！警方已經介入調查，涉事店鋪被勒令停業，老闆亦被帶走問話。事件曝光後，引起全網譁然，不少網民直言驚恐，有人說懷疑自己樓下間麻辣燙都係咁，食完之後仲想再食。

據內媒《紅星新聞》報道，安康市漢濱區市場監管局嘅負責人透露，案件其實早喺年初已經發生。當時執法人員進行暗訪，買咗幾份滷味返去檢驗。結果快檢試劑顯示滷味中含有罌粟鹼成分，當局隨即聯合公安部門到現場調查。執法人員到達現場後，喺店內搜出一袋罌粟殼，並即時封存作為證物送檢。檢測結果確認確實係罌粟殼。後續又將店內製作嘅牛肉等滷味樣本送往檢測機構，結果顯示含有嗎啡、罌粟鹼、那可丁等成分，全部屬於受嚴格管制嘅麻醉物質。面對鐵證，滷味店老闆供認不諱，表示因為生意太差，想用罌粟殼提升味道、令客人上癮。佢以為落少少唔會出事，點知最終被查個正著。涉事滷味店目前已經全面停業整頓，老闆已被公安拘留，案件正進一步調查中。

事件喺社交平台迅速爆紅，唔少網民留言表示後怕，有人話懷疑自己屋企附近間麻辣燙都係咁，食完就忍唔住想再食；亦有人講，朋友每日三餐都食螺螄粉，可能都中招。有網民自嘲話，原來唔係味精多，係「毒味重」，笑中帶驚。

其實內地早有類似前例。2016年，中國國家食品藥品監督管理總局曾公布，全國有35間食肆喺食品中非法添加罌粟成分，包括罌粟鹼、嗎啡、可待因、那可丁、蒂巴因等多種物質，涉嫌違法使用添加劑。被移交公安並起訴嘅餐廳包括安徽宿州市周黑鴨宿蒙路口店、宿州市埇橋區慧鵬周黑鴨經營店、廣東惠州市惠陽區老鐵烤魚、重慶市合川區小沔鎮有名麵館，以及同區嘅天下第一粉等。

當局當時指出，喺食品中添加罌粟殼或罌粟粉，嚴重違反《食品安全法》第34條第一項，該條明確禁止以非食品原料製作食品，或添加可能危害人體健康嘅化學物質。根據《最高人民法院、最高人民檢察院關於辦理危害食品安全刑事案件適用法律若干問題的解釋》，涉事行為可構成生產、銷售有毒有害食品罪。當年35間涉事餐廳之中，有25間已被公安立案刑事調查，其餘10間亦遭食藥監部門立案處理。今次安康事件重演，顯示「以毒留客」嘅歪風仍未根絕。