內地資深媒體人、《環球時報》前總編輯胡錫進，喺社交媒體再次發文，大聲疾呼話中國嘅輿論環境應該要「更寬鬆」，要喺「黨領導嘅憲法秩序下盡量寬鬆啲」。佢呢番言論一出，隨即喺內地網絡掀起熱議。

胡錫進近排發文批評地方官僚主義同形式主義，對社會精神繁榮造成「羈絆效應」，今次佢就將矛頭直指言論空間。佢喺佢嘅微博度話，眼見而家好多有身份嘅群體，喺社交媒體發聲都越嚟越小心，甚至乎直頭唔出聲，呢種「群體性噤聲」令到公共輿論面貌變得唔完整，絕對唔係一個開放社會應有嘅樣。

佢認為，出面依個情況，根本原因係「社會寬容度變低咗」。一個人喺網上發表個人睇法，引嚟麻煩嘅風險愈嚟愈高，甚至乎會牽連到佢所屬嘅機構，所以大家主動或者被動，都大大減少咗參與交流嘅意願，淨係得番「碌下」、「點個讚」。佢強調，如果只剩低一啲群體活躍表達，咁樣嘅情況一定唔會太好，會引致新嘅問題。

胡錫進仲話，中國嘅發展絕對唔係「管」出嚟嘅，而係「開放」出嚟嘅。佢呼籲，為咗中國嘅長遠發展同埋社會嘅多元化，政府應該要喺「憲法秩序下」推進社會嘅寬鬆同自由。佢嘅呼籲，表面睇嚟好似係幫網民爭取言論自由咁，但佢句句都唔敢提「言論管制」四隻字，只係將個波踢畀「社會寬容度」同「地方官僚」。

呢篇文一出，網上即刻爆咗煲。大部份網民都話老胡睇法膚淺，避重就輕，佢講嘅「社會寬容度低」根本就係偽命題，真正嘅問題係「上面」嘅強力管制。有網民直接留言「收皮啦老胡！你以前煽動民族主義嗰陣，有冇諗過咩叫寬容度？」，又話佢係「牆頭草」、「雙面人」。亦有人將佢呢番言論解讀為「體制內嘅矛盾爆發」，暗示佢可能係為咗觀察輿論風向，或者係「小罵幫大忙」嘅老套路。

有網友話，胡錫進嘅言論喺敏感時間點出咗一個好重要嘅問題，就係有身份嘅人都唔敢發聲，顯示連一向幫手唱讚歌嘅體制內都感受到壓力。但佢亦強調，胡錫進嘅講法始終離不開「黨領導」嘅框架，佢將責任推卸畀「地方官僚」同「社會寬容度」，其實係隔靴搔癢，冇實質作用。

事實點樣大家心照，只要仲係「黨領導」，中國嘅輿論就冇可能真正開。呢個黨唔講信用、朝令夕改呀！當日毛澤東原先話廣納諫言，點知轉頭就「引蛇出洞」、大搞反右運動。鄧小平曾經話過黨應該接受群眾批評，但係鬥低咗華國鋒之後即刻就收窄言論。江澤民同胡錦濤時期算係相對自由，但習近平一上台又行返轉頭。

因為乜嘢講得、乜嘢唔講得，都係黨定義嘅，仲可以隨時變標準，咁樣搞法仲有邊個夠膽講嘢？我點知今日講嘅嘢啱規矩，聽日就唔啱規矩畀人封殺呀？