中美兩國從昨日開始向對方嘅遠洋運輸公司徵收港口費。呢個針鋒相對嘅舉動，令公海成為全球兩大經濟體貿易戰嘅最新前線。呢項措施唔單止影響全球航運業運作，仲可能扭曲國際貨運流向，加劇供應鏈緊張。同日，中國商務部宣佈，對韓華海洋株式會社旗下五間美國相關子公司採取反制措施，將佢哋列入「不可靠實體清單」，禁止中國境內嘅組織同個人同佢哋交易或合作。

呢場海上貿易戰嘅導火線，要追溯到今年年初。根據美國貿易代表辦公室（USTR）4月17日公布嘅301調查結果，美國由10月14日起，對中國籍船舶或與中國有關嘅船舶徵收額外港口費。美方指控中國透過不公平政策主導全球航運、物流同造船業，損害美國利益。特朗普政府聲稱，此舉旨在削弱中國喺全球航運業嘅影響力，並推動美國本土造船業復興。新港口費由每噸50美元起，每年加30美元，至2028年達每噸140美元；對中國建造但非中國控制嘅船舶，則按每淨噸18美元或每集裝箱120美元計算，逐年遞增至33美元或250美元。

分析指，呢項措施對中遠集團（COSCO）衝擊最大。中遠作為全球最大航運公司之一，船隊頻繁往返中美航線，料每年需額外支付數億美元。傑富瑞集團（Jefferies）分析師諾克塔（Omar Nokta）指出，呢會推高營運成本，迫使中國船公司改航線或轉向第三方港口，拖慢全球物流效率。船舶經濟公司Xclusiv Shipbrokers報告警告：「呢種對等報復，令兩大經濟體陷入港口費漩渦，恐令全球貨運流動出現扭曲。」報告又指，當前貿易與環保政策被政治化，航運業正由中立通道變成國家工具。

面對美方行動，中國迅速反擊。10月10日，中國交通運輸部宣佈，自10月14日起，對涉美船舶徵收特別港務費，每總噸400人民幣起，逐年遞增，至2028年達1,157人民幣。中方強調，呢係正當防衛，為維護中國航運企業權益。公告明確指出，凡屬美國擁有、運營、建造、懸掛美國旗、或由美國持股25%以上、具投票權或董事席位嘅船舶，都會被徵費；唯中國建造嘅船舶可豁免，以保護本土造船業。

諾克塔預測，中方反制會影響全球13%原油油輪同11%貨櫃船。Vortexa能源研究公司指，有43艘液化石油氣超級油輪（約佔全球船隊10%）會直接受影響。除港口費外，中方反制亦延伸至貿易範圍。商務部同日宣佈，為反制美國301調查，將韓華海洋旗下五間美國相關公司列入黑名單，包括韓華海運、韓華費城造船廠、韓華海洋美國國際、韓華海運控股同韓華美國控股，禁止任何中國企業或個人同佢哋合作。

消息公布後，韓華海洋股價一度急挫8%，市場憂慮供應鏈中斷。Reddal副總裁曹坤（Kun Cao）對美聯社表示：「北京正向外界釋放訊號，警告唔好幫華盛頓挑戰中國嘅海上主導地位。」韓華近年積極與美方合作，試圖打破中國喺造船業嘅壟斷。去年，韓華以1億美元收購美國費城造船廠，今年再投資50億美元擴建碼頭同造船設施，並簽約為美國海軍提供維修服務。今年5月，韓華亦宣布退出中國合資項目，全力轉向美國市場。

目前，美國企業持有嘅全球船隊僅佔2.9%，造船總噸位更只得0.1%。特朗普政府誓言要喺「再工業化」框架下重振造船業，今次港口費戰被視為關鍵一步。不過，世界航運理事會總裁克拉梅克（Joe Kramek）警告，呢場互徵戰「會傷害雙方出口商、生產商同消費者，喺全球貿易已經承壓嘅時候，無異於火上加油」。零售商與製造商估計，增加嘅成本最終會轉嫁畀消費者，令進口商品加價。美國官員亦警告，若中國繼續支持聯合國國際海事組織（IMO）嘅減排倡議，相關國家可能會被美方追加船舶費或制裁。

自2018年中美貿易戰爆發以來，戰線已由關稅擴展到科技、礦產、再到航運。今次「公海交鋒」，意味貿易戰進入新階段。分析人士憂慮，若雙方繼續升級，全球供應鏈恐怕難逃震盪。中國能否取代美國成為頭號強國，仍有待觀察。不過眼前，呢場港口費戰已令航運業警鐘大響，預示更大風浪即將到來。