廣東省將喺出年年初起正式實施新規，夫妻雙方可依法互查對方名下嘅房產、車輛等財產狀況。消息一出，內地社交平台即時熱爆，唔少網民留言大讚：「終於可以揭穿男人包二奶的秘密！」

據《南方都市報》報道，廣東省人民代表大會常務委員會近日公告，已通過《廣東省實施〈中華人民共和國婦女權益保障法〉辦法》，並將喺出年1月1日起正式施行。相關辦法明確指出，夫妻一方只要持有身分證、結婚證等能證明夫妻關係嘅有效文件，就可依法向不動產登記中心或車輛管理部門申請查詢另一方名下嘅財產狀況。相關單位必須受理，並出具正式嘅書面回覆。換句話講，以後無論係老公定老婆，只要手上有合法文件，就可以查清楚對方有冇房、有冇車，甚至有冇暗地裏轉移資產。

消息曝光後，「夫妻財產互查」即登上微博熱搜榜，引發網民激烈討論。好多人認為呢項制度係保障婚姻中弱勢一方嘅重要舉措，尤其對女性嚟講意義重大。有網民留言：「離婚最怕就是對方早早轉走資產，自己什麼都分不到。現在終於可以有保障！」亦有人表示，新規有助提升婚姻透明度：「知情權是基本人權，合法查詢配偶財產非常必要。」法律界人士指出，新規等於正式制度化「夫妻共同財產知情權」，令一方能更有效維護自身權益，避免喺婚姻破裂時陷入被動局面。

根據《星島日報》報道，廣東夫妻可互查財產嘅消息引發全國關注，唔少網民拍手叫好。有留言寫道：「有多少男人有錢後背著一直默默支持他的老婆出去包二奶！建議全國推廣。」亦有人提議當局應進一步擴大政策範圍，唔止能查資產，仲應包括查負債、存款、甚至違法紀錄等，令婚姻更加「透明化」。有網民更笑言：「以後想搞地下情都要三思，因為資產難再瞞得過老婆啦！」

學者分析認為，呢項政策唔單止係婦女權益嘅進步，仲反映出中國婚姻制度愈趨現實化。隨住離婚率上升、財產糾紛頻繁，政府推行「互查」制度，被視為對現實問題嘅回應。但亦有專家提醒，若查詢制度被濫用，可能會導致夫妻之間嘅信任進一步削弱，婚姻會變得好似一場審計，唔再係基於信任嘅關係，呢個係制度帶嚟嘅新挑戰。