荷蘭政府正式出手，接管一間由中國資金控制、但喺荷蘭設總部嘅半導體公司——安世半導體（Nexperia），引爆中歐新一輪科技角力。母公司聞泰科技（Wingtech）發表強硬聲明，直斥荷蘭政府「以莫須有嘅國家安全為藉口」，批評係「地緣政治偏見主導嘅過度干預」，強調「絕對唔會屈服於外部壓力」，並已經啟動法律同外交途徑，要求荷方立即撤回呢份「錯誤指令」。

荷蘭政府史上第一次動用《物資可得法》（Goods Availability Act），指為保障「荷蘭同歐洲領土上關鍵科技知識同能力嘅安全」，全面接管設喺奈梅亨（Nijmegen）嘅安世半導體。荷蘭經濟部喺聲明中指出，公司「存在嚴重嘅公司治理問題」，認為其運作「可能威脅歐洲汽車同電子產業嘅晶片供應安全」。

荷蘭經濟部長 Karremans 亦獲得新權力，可以直接否決或推翻公司董事會決定。荷蘭政府其實早喺 9 月 30 日就已經行動，但直到 10 月 12 日先公開。當局解釋，行動目的係「防止一旦出現危機，安世生產嘅晶片同半製成品變得無法取得」。

聞泰科技發聲明，嚴厲批評荷蘭政府「以莫須有嘅國家安全為名，對安世半導體實施全球業務凍結」，屬「基於地緣政治偏見嘅過度干預」，並非根據實際風險評估。聲明指，呢個做法「嚴重違反歐盟長期提倡嘅市場經濟、公平競爭同國際貿易原則」，屬於對中資企業嘅「系統性歧視」。

公司指出，安世半導體內部「個別外籍管理層」試圖透過法律途徑，強行改變公司股權結構，而呢啲行為「同荷蘭政府嘅指令高度聯動」，本質上係「借政治壓力剝奪股東權利、顛覆公司合法治理結構」。聞泰強調，「以合規為名、行奪權之實」嘅行為令人無法接受，公司已展開法律同外交行動維權，要求荷蘭撤回錯誤決定。

根據聞泰公告，荷蘭經濟事務及氣候政策部喺 9 月 30 日向安世半導體發出「部長令」（Order），要求安世及其全球 30 間子公司、分公司及辦公室，一年內唔可以對資產、知識產權、業務或人員作出任何調整。同日，阿姆斯特丹上訴法院企業法庭裁定，聞泰科技暫時失去對安世半導體 99% 股份嘅股東權，包括治理權同投票權，只保留一股象徵性持股。安世執行長張學政職務亦被暫停，法院決定委任一名具「決定性投票權同獨立代表權」嘅外部董事加入公司管理層。不過，聞泰仍保留安世嘅經濟收益權，即收入同分紅權益唔受影響。

安世半導體總部設喺荷蘭，但早喺 2019 年就俾中國聞泰科技收購。華府已經將聞泰列入「實體清單」（Entity List），美國企業若要同佢交易，必須取得幾乎唔可能批嘅特別許可。英國政府去年亦以國家安全為由，禁止聞泰收購英國晶圓廠 Newport Wafer Fab。美國商務部上月宣佈，任何由中國企業持股超過 50% 嘅公司，都會自動被列入黑名單。中國商務部上星期六亦反擊，宣佈限制稀土出口，衝擊全球從汽車到風力發電嘅整條產業鏈。

荷蘭經濟部強調，呢次行動「唔係針對任何國家或行業」，但事件或象徵中、歐正式踏入「科技脫鉤」階段。安世半導體長期為歐洲汽車行業供應電源管理及車用晶片，今次被凍結管理權，勢必波及下游產業鏈。中國財經媒體引述業界人士分析，荷蘭此舉可能係基於對半導體技術外流嘅風險考量，特別係安世喺汽車及關鍵基建領域嘅地位，令歐洲各國政府極度敏感。