NBA中國同阿里巴巴旗下阿里雲今日（9日）正式宣布，雙方簽咗一份多年期合作協議，阿里雲會成為NBA中國官方雲端運算同人工智能（AI）合作夥伴。根據協議，阿里雲會開發一系列創新應用，用AI技術嚟提升比賽直播嘅觀賞體驗同球迷互動，相關項目會圍繞NBA全明星賽、季後賽同總決賽等大型賽事展開。

NBA中國賽將會喺聽晚（10日）晚8點同10月12日晚7點，喺澳門威尼斯人綜藝館舉行，由布魯克林籃網對陣菲尼克斯太陽。呢兩場季前熱身賽預料會吸引大批球迷入場睇波。阿里巴巴集團主席兼布魯克林籃網隊主席蔡崇信話，人工智能同雲技術係「完美嘅連接器」，透過同NBA中國合作，配合阿里最新嘅AI技術，會為中國球迷帶嚟「前所未有嘅超凡體驗」。

據悉，NBA中國會全面採用阿里雲嘅AI同雲端技術，支援多個數碼化球迷互動項目。當中包括基於阿里自家「通義千問」系列基礎模型，專門為NBA中國開發AI模型。呢個模型會根據NBA嘅數碼資產作微調，為NBA中國App用戶提供互動內容，包括：

* 即時比賽精華

* 籃球歷史數據

* 球員數據深度分析

* 熱門籃球話題AI互動

阿里雲亦會首次喺「淘寶88VIP呈獻—NBA中國賽2025」引入360度即時回放技術。呢套系統結合AI算法，可以捕捉球員動作並生成環迴視角嘅回放畫面，等觀眾可以由唔同角度重溫比賽精華。

今年NBA中國賽現場嘅「NBA House」仲會展示多項由阿里雲AI技術加持嘅創新互動體驗。球迷可以現場整個人化NBA主題虛擬形象，再錄自己聲音樣本，AI就會模仿你嘅音色，幫你生成一段經典比賽嘅解說片段，夠晒玩味。另外，阿里巴巴旗下兩個AI應用「夸克」同「通義App」亦會成為NBA中國官方市場合作夥伴，推出一連串面向中國球迷嘅互動活動。

今次合作可以話係NBA同中國當局「破冰」再握手。早喺2019年，因為「撐香港」風波，NBA喺中國內地被全面封殺。《央視》停播NBA賽事超過兩年，連每年固定舉行嘅NBA中國賽都被腰斬。事件起因係2019年10月4號，美國侯斯頓火箭隊總經理達雷爾·莫雷（Daryl Morey）喺Twitter發文，貼上「Fight for Freedom, Stand with Hong Kong（為自由而戰，與香港同一陣線）」呢句口號，引發中國官方強烈反應。

10月6號，中國駐侯斯頓總領事館出聲，要求火箭隊「立即糾正錯誤」，《央視》亦要求NBA懲罰莫雷。NBA翌日出聲明想平息事件，但被美國輿論批評「向中國跪低」。美國議員盧比奧（Marco Rubio）、萬斯（J.D. Vance）等人其時都狠批NBA「為咗錢犧牲言論自由」。之後，中國掀起全面抵制潮，NBA中國賽停辦，《央視體育頻道》喺2020至2021賽季停播NBA，直至2022年3月先全面恢復播放。