人工智能龍頭OpenAI執行長奧特曼近日明確表態，表示對台積電高度信任，暫時冇打算採用英特爾代工服務。

奧特曼喺接受專訪時被問到，會唔會考慮用英特爾代工嚟分散風險、減低對單一供應商嘅依賴？佢直言：「目前最重要嘅係希望台積電能夠進一步擴大產能，而唔係搵替代方案。」當被追問會唔會希望台積電加快投資步伐時，佢亦毫不猶豫地點頭，顯示對台積電技術實力同產能穩定嘅高度信心。

外界普遍認為，奧特曼嘅立場並非偶然。雖然OpenAI而家未有直接涉足晶片製造，但據多方報導，公司正研發自家AI專用晶片，並會採用台積電先進嘅3奈米製程。呢一點意味住，台積電嘅技術成熟度同生產穩定性，正係支撐OpenAI長期戰略嘅核心基礎。

不過，隨住輝達（NVIDIA）、AMD等科技巨頭都高度依賴台積電，市場對「供應鏈過度集中」嘅擔憂愈來愈多。美國政府同企業正積極推動「半導體本土化」，希望透過英特爾同其他代工夥伴建立一個更具韌性嘅產業鏈。不過，業界人士指出，英特爾同三星（Samsung）喺先進製程嘅量產能力仍然有待考驗，短期內要撼動台積電地位並唔容易。

英特爾近年全力重返代工市場，推出咗Intel 18A製程，主打高效能同節能優勢。公司聲稱，新一代Panther Lake處理器嘅能效比上一代Lunar Lake提升30%，但業界對其實際良率同量產進度仍持觀望態度。多間分析機構認為，英特爾若想吸引OpenAI、輝達等高端AI客戶，仍需證明喺穩定性同成本控制上嘅實力。

同時，AMD執行長亦表明對台積電有長期信任，但未完全排除未來同英特爾合作嘅可能。而黃仁勳就以幽默嘅語氣話：「英特爾過去三十幾年都想幹掉我哋，而家就變左合作夥伴，呢個世界真係有趣。」呢番說話道出業界競合關係嘅微妙平衡。有暗指英特爾嘅霸主地位不保之意。

對OpenAI嚟講，選擇台積電唔單止係技術考量，更係信任同戰略穩定嘅選擇。台積電目前喺3奈米同2奈米製程上繼續領先全球，亦係多間AI企業嘅主要合作夥伴。相反，英特爾代工業務雖然得到美國政府政策支持，但市場信任仍未完全建立。