共和黨同民主黨議員喺重新開放聯邦政府嘅問題上陷入僵局，幾乎冇乜跡象顯示雙方會展開有意義嘅談判，去結束呢場已經持續幾日嘅停擺。美國總統特朗普表示，聯邦員工嘅裁員行動已經展開。

日前特朗普被問到會唔會兌現之前嘅威脅，解僱聯邦員工時，佢回應記者：「呢件事而家就發生緊，全部都係民主黨搞出嚟嘅。」佢又補充：「民主黨正造成大量工作流失。」不過，特朗普拒絕透露邊啲機構會受影響。呢種裁員可能性，進一步加劇咗華盛頓原本已經緊張嘅氣氛。雙方領袖都認為民意正傾向自己陣營，令佢哋都唔願意讓步。

民主黨堅持要求延長《平價醫療法案》（又稱奧巴馬醫保）嘅補貼，幫助數百萬家庭支付醫療費用；特朗普就希望維持現有開支水平，認為民主黨最終會因就業同聯邦計劃面臨風險而被迫妥協。呢場爭拗發生喺經濟動盪時期，雖然美國經濟今年持續增長，但特朗普嘅進口關稅打擊企業信心，通脹高企、招聘放緩，再加上近2萬億美元嘅年度財政赤字，令形勢更添壓力。

眾議院民主黨領袖傑弗里斯星期日接受訪問時指出，自上星期一白宮會面之後，就再冇同共和黨領導層傾過。「不幸嘅係，自嗰陣起，包括特朗普喺內嘅共和黨人都保持沉默，」佢話。傑弗里斯批評共和黨係眾議院取消投票、特朗普竟然係呢個時候仲去高爾夫球場打波，形容呢啲都唔係負責任嘅表現。

特朗普政府視今次停擺為擴大預算權力嘅機會。多名官員話，會透過永久裁減數千名聯邦員工嚟慳錢，呢個策略可謂前所未有。雖然裁員係特朗普主導嘅決定，但佢堅持將責任推畀民主黨。「一切取決於佢哋，」特朗普喺星期日上午登上總統直升機，前往弗吉尼亞州諾福克出席海軍建軍250週年活動前同記者講。

雖然「你被炒魷啦！」係特朗普嘅經典金句，但共和黨議員星期日就話，特朗普政府唔想真係炒人，只係暫停咗民主黨地盤入面嘅基建同能源項目資金。眾議院議長約翰遜（Mike Johnson）喺NBC節目入面表示：「我哋暫時未見到具體裁員，但呢個情況確實令人遺憾，總統唔想見到咁樣。」白宮國家經濟委員會主任哈塞特（Kevin Hassett）喺CNN話，政府希望避免裁員，並希望民主黨同意簽個臨時協議，畀七星期時間傾掂數，但實際上局面由共和黨掌控。

加州民主黨參議員希夫（Adam Schiff）為黨方立場辯護，指出數百萬美國人嘅醫療費可能會上升，令佢哋難以負擔保險。佢又批評特朗普政府扣起咗國會批準嘅49億美元對外援助，削弱民主黨喺預算妥協上嘅籌碼，強調必須有書面保證特朗普唔會反口。

共和黨係政府停擺嘅關鍵時期，傳出一段將傑弗里斯P成戴墨西哥帽、留鬍鬚嘅影片，副總統萬斯就話只係「玩笑」，但就強調民主黨嘅要求會令非法移民受惠醫療支出係事實。民主黨則反駁，非法留美移民根本冇資格享受聯邦醫療計劃，包括《平價醫療法案》同醫療補助，只係醫院可以就緊急護理申報報銷。

儘管共和黨聲稱仍與民主黨接觸，但實際上進展甚微。上星期參議院就共和黨提出嘅重啟政府法案投票，未能取得60票結束辯論。約翰遜話眾議院將休會至下星期，可能逼參議院配合。參議院民主黨領袖舒默（Chuck Schumer）喺CBS批評約翰遜「唔認真」，竟然畀議員放假；多數黨領袖圖恩（John Thune）就話，只要民主黨唔讓步，政府就會繼續削減開支，員工要放無薪假，期望有啲民主黨人會改變主意。

停擺已經進入第五日，預計會持續到下星期，聯邦員工人心惶惶，唔少公共服務被迫中斷。特朗普政府預算辦主任沃特（Russ Vought）警告，大規模裁員即將展開，針對唔符合特朗普優先事項嘅機構。民主黨工會已經入稟法院想阻止，但程序仍可繼續。兩黨互相指責，民眾怨氣上升，但談判前景依然黯淡。