瑞典「環保少女」通貝里（Greta Thunberg）再度成為國際焦點。呢位年僅22歲、以氣候行動聞名全球嘅瑞典環保人士，最近參與一項名為「全球堅毅船隊」（Global Sumud Flotilla）嘅人道行動，試圖運送救援物資入加沙。船隊途中被以色列軍方攔截，通貝里隨即被拘留，其後更聲稱喺被扣期間遭受粗暴對待，包括被拖行、毆打、強迫親吻以色列國旗，仲話囚室有床蝨、冇食物、冇水。以色列方面就全面否認指控，稱所有拘留程序「合符人道及合法標準」。

據《衛報》報道，事件發生喺上星期，「全球堅毅船隊」共有超過40艘船，總共437人參與，包括議員、律師同人權工作者。佢哋由地中海多個港口出發，目標係突破以色列對加沙長達16年嘅海上封鎖，為當地戰火下嘅平民運送醫療用品同食物。不過，船隊喺接近加沙海域時被以軍攔截，所有成員被扣押，其中包括通貝里。希臘外交部證實，星期一當地時間，一班載有161名被驅逐出境人士嘅航班抵達雅典，其中包括通貝里本人，以及27名希臘人同來自近20個國家嘅公民。

瑞典外交部官員其後探訪通貝里，並向佢家人發出電郵通報情況。據信件內容顯示，通貝里出現脫水情況，身上有疑似床蝨叮咬引起嘅紅疹，環境惡劣，食水及糧食短缺，要長時間坐喺水泥地面上休息。另一名被扣者形容，曾見到通貝里被迫手持一面不明旗幟影相，「好似俘虜咁」。

以色列外交部就事件發聲明回應，聲稱「所有被扣人士嘅法律權利都有保障」，並公開一張通貝里喺機場嘅照片，強調佢「狀況良好」。以方反指，唯一涉及暴力嘅事件，係有一名活動人士喺Ketziot監獄咬傷咗一位女醫護人員。

不過，土耳其籍船隊成員Ersin Çelik爆料，指通貝里被士兵拖行、毆打，仲被逼親吻以色列國旗；另一名意大利記者Lorenzo D’Agostino更聲稱，通貝里被「用以色列國旗包住，好似戰利品咁畀人示眾」。一個代表船隊成員嘅國際組織亦發表聲明，指九名已返瑞士嘅被捕人士當中，有人聲稱被剝奪睡眠、缺乏飲用水同食物，甚至有人被拳打腳踢、關進鐵籠。該組織批評以色列違反國際人道法，要求聯合國介入調查。

通貝里獲釋後抵達雅典機場，即場喺傳媒同群眾面前發表強硬聲明：「我要講得好清楚——而家發生緊嘅，係一場種族滅絕。」佢指控以色列喺加沙展開嘅軍事行動「已經超越任何防衛範圍」，並斥責國際社會「對巴勒斯坦人民嘅苦難視而不見」。佢又話：「全球政治體系已經徹底背叛咗巴勒斯坦人民，連最嚴重嘅戰爭罪行都冇人阻止。『全球堅毅船隊』就係喺各國政府失職之際，為人道、公義同尊嚴挺身而出。」