以色列同哈瑪斯（Hamas）代表團噚日（6號）喺埃及紅海渡假勝地夏姆錫克（Sharm El Sheikh）展開首日間接談判，試圖就美國總統特朗普（Donald Trump）提出嘅「加沙停火計劃」達成共識。不過，雙方喺以軍撤離、哈瑪斯解除武裝等關鍵議題上出現分歧，首輪磋商以僵局收場。

據《路透社》報道，特朗普嘅停火計劃原則上已獲得雙方「基本支持」，內容包括：全面停火、人質交換同允許國際援助物資湧入加沙（Gaza）。計劃亦得到多個阿拉伯及西方國家背書，美方形容呢次係「兩年戰爭以嚟最有機會達成持久和平」嘅一次會談。

特朗普本人喺白宮見記者時信心滿滿：「我真係覺得今次有機會達成協議，呢次會係一個長久嘅和平。」據悉，佢已經向以色列施壓，要求暫停轟炸加沙，以營造談判空間。不過，加沙居民話，雖然轟炸次數有減少，但戰機依然喺頭頂盤旋，爆炸聲不絕於耳。加沙衛生部公佈，過去24小時內，以軍空襲造成19人死亡，約為過去幾星期每日死亡人數嘅三分之一。但軍方仍然喺加沙市發動咗一場「自戰爭爆發以來規模最大」嘅地面攻勢。

談判由埃及、美國同卡塔爾三方聯合斡旋。巴勒斯坦方面消息透露，首輪會談已喺深夜結束，第二輪將喺7號展開。哈瑪斯代表團由組織流亡領袖哈亞（Khalil Al-Hayya）領導——佢上個月喺卡塔爾首都多哈（Doha）逃過以軍空襲，但失去咗自己嘅兒子。

消息指，哈瑪斯明確提出兩大訴求：其一係人質釋放交換安排；其二係以軍撤出加沙嘅具體範圍同時程。哈瑪斯擔心，以色列會「口講永久停火、實際再度進攻」，因此要求國際機制監督落實。一名以色列高層安全官員則透露，首階段談判將只集中處理人質問題，「我哋會畀哈瑪斯幾日時間完成呢個階段，之後再討論其他內容」。

根據聯合國數據，戰爭至今已導致超過6.7萬名巴勒斯坦人死亡，220萬加沙居民大多流離失所，缺糧、缺水、缺電、缺藥，陷入人道災難。喺加沙市，民眾唯一嘅願望就係「停火」兩個字。但喺以色列內部，輿論分裂。雖然有唔少家庭要求政府盡快結束戰爭、帶返人質，但以色列總理內塔尼亞胡（Benjamin Netanyahu）內閣入面嘅強硬右翼成員就堅決反對任何形式嘅停火，主張「打到哈瑪斯冇晒還擊能力為止」。

特朗普今次想憑加沙和平協議重塑佢嘅國際領袖形象。佢宣稱自己係「唯一有能力喺加沙帶來和平」嘅世界領袖，並希望藉此修補美國與阿拉伯世界嘅裂痕。不過，內塔尼亞胡喺國內面對右翼盟友嘅強烈壓力，一旦作出任何讓步，隨時會觸發內閣分裂。

一名熟悉會談進展嘅官員表示：「雖然特朗普想快啲簽，但今次談判至少都要幾日時間。」另一名巴勒斯坦消息來源就話，特朗普要求「72小時內釋放人質」嘅期限根本唔現實，因為部分人質已經喺戰火中喪生，「要搵返遺體、收殮、確認身份，都要時間。」

以色列代表團陣容強勁，包括情報機構摩薩德（Mossad）同國家安全局辛貝特（Shin Bet）官員、外交顧問法克（Ophir Falk），以及人質協調員赫施（Gal Hirsch）。據三名以色列官員透露，首席談判代表、戰略事務部長德默爾（Ron Dermer）有望喺稍後階段視進展加入。美方代表團則包括中東特使魏科夫（Steve Witkoff）及特朗普女婿庫什納（Jared Kushner），二人與以色列高層關係密切，被視為白宮與特拉維夫之間最重要嘅溝通橋樑。