因為十一國慶節撞正中秋節，內地迎嚟一個一連放足八日假嘅「超級黃金周」長假。正當唔少人都趁機出遊放鬆身心之際，一條浙江鞋廠老細喺廠房入面當眾侮辱員工嘅片段，就喺網上瘋傳，惹嚟好大嘅迴響。呢位老細因為員工不滿只放兩日假，竟然當面鬧人：「你哋冇公務員條命，就咪發公務員條病！係牛馬就老老實實同我耕田啦！」將勞工直接比喻做「牛馬」，赤裸裸嘅羞辱即刻撻着咗公眾對內地打工仔權益嘅怒火。

據旅居海外嘅華僑作家「李老師不是你老師」喺 X 平台上分享嘅片段，事發喺浙江一間鞋廠。片中顯示，呢位老細向員工宣佈「國慶只放兩日假」之後，見到有人表達不滿，就隨即發火鬧：「有個別員工仲要喺度嘈嘈閉，嫌得兩日假少。你哋冇公務員條命，就咪發公務員條病！聽清楚未？」

有網友自嘲：「話打工仔係牛馬未免太過抬舉，你見過邊隻牛馬自己買飼料嘅？農場主會喺飼料入面加啲咖啡因，令到啲牛馬食少啲做多啲，打工仔咖啡因仲要自己買，簡直連牛馬都不如。」

呢件事唔單止係單純嘅勞資糾紛，佢好似一支針咁篤穿咗長久以嚟困擾住內地勞工嘅核心問題：點解一個自稱「社會主義國家」嘅地方，勞工嘅權益竟然會咁難得到保障？

一直以嚟，內地改革開放之後嘅經濟高速發展，都係建立喺所謂「低人權優勢」之上。透過超低廉嘅人工同埋近乎冇保障嘅勞工條件，吸引大量外資進駐，由佢哋大規模生產低價產品，傾銷去全世界，搞到其他國家嘅製造業都叫苦連天，呢個就係內地喺國際上製造業「內捲」嘅威力。

有人可能會話，早期發展嗰陣，人工低有其時代背景。但係，事過境遷，今日嘅中國已經可以話係發達國家，經濟總量全球第二。但係點解打工仔嘅待遇，依然要做到死做到爛，好似牛馬咁？

癥結就係：內地嘅勞工背後根本冇一個可靠嘅工會組織去撐腰。喺歐美，勞工今日有較低嘅工時同相對合理嘅工資，係工會用幾十年甚至上百年時間爭取返嚟嘅成果，絕對唔係政府施捨畀你。但係喺內地，工會組織並非獨立運作。佢哋通常都係設立喺企業內部，而且有黨員監管，就好似紀委咁。「球員兼球證」成效有幾大，大家心裏有數。

點解內地唔可以有私人同埋獨立嘅工會組織？好簡單：因為黨唔准。如果一個獨立運作嘅工會發揮到影響力，組織到一場大型罷工，咁黨嘅顏面何存？威信何在？喺內地，得黨先至可以有影響力，任何個人或私人組織夠膽踩過界、挑戰佢嘅權威，下場就係俾人封殺。勞工權益嘅保障，永遠都係擺喺「維穩」同「黨嘅統治」之後。

所以，今次浙江鞋廠老細口中嘅「牛馬論」，唔單止係一句惡毒嘅侮辱，佢亦都赤裸裸地揭示咗，喺內地，打工仔要爭取合理權益，依然係一件遙遙無期嘅事。