日本自民黨總裁選舉即將於10月4日舉行，呢場選舉唔單止會選出黨內新領袖，更會直接決定下任首相人選。現任首相石破茂上任不足一年，就因為連續敗選同黨內壓力，9月7日宣布辭職，任期得大約11個月，成為近年日本政壇動盪嘅縮影。

角逐總裁嘅五位候選人之中，高市早苗係唯一女性參選人，自然成為焦點。佢以保守右翼立場聞名，被視為已故前首相安倍晉三嘅堅定繼承者，仲以英國前首相「鐵娘子」戴卓爾做精神偶像，誓要成為日本第一位女首相。今次已經係高市第三度挑戰，佢能唔能夠打破呢個紀錄，成為歷史性里程碑？

石破茂辭職，係因為自民黨執政聯盟喺2024年眾議院同2025年7月參議院選舉中接連失利，國會兩院都冇咗絕對多數席次。黨內批評聲音愈來愈大，指佢未能有效應對米價暴漲、整體物價指數接連新高等民生危機。石破雖然曾經表態「從新開始」，但最後以避免黨內分裂為由退陣，會喺新總裁出爐之後正式卸任。

今次選舉採取「國會議員295票 + 地方黨員295票」各半嘅制度，幾乎肯定要入決選。五位候選人包括：農林水產大臣小泉進次郎、前幹事長茂木敏充、現任官房長官林芳正、前經濟安保大臣小林鷹之，同埋高市早苗。

44歲嘅小泉進次郎係前首相小泉純一郎之子，被視為政壇明日之星。佢最近積極處理米價危機，贏得年輕選民支持。林芳正、茂木敏充都有豐富內閣經驗，林外交強，茂木強調團結；小林鷹之則屬於新一代保守派，主打經濟安保。相比之下，64歲嘅高市資歷最深，係選舉入面嘅「一點紅」。

高市1961年生於奈良縣，出身普通家庭，父親係上班族，母親做警察。佢中學時候性格反叛，甚至一度加入「暴走族」，重機騎上學。不過，學業成績優秀，後來考入神戶大學經營系。佢熱愛搖滾樂團，例如鐵娘子、黑色安息日，仲做過鼓手。畢業後考入松下政經塾，再去過美國國會做研究員。1992年31歲時，首次以無黨籍身份當選眾議員，1996年加入自民黨。

佢喺政壇形象一向敢言。2006年安倍晉三首次組閣時，高市入閣，之後成為首位女性政調會長同總務大臣。佢立場鮮明：反對女性天皇、反對同性婚姻、支持修改憲法第九條。佢仲係安倍「台灣有事就是日本有事」論述嘅堅定支持者，曾多次同蔡英文交流，推動日台合作。

不過，高市右翼色彩亦帶嚟爭議。佢多次參拜靖國神社，亦批評石破外交軟弱。喺移民政策方面，佢近日公開強調「驅逐非法居留者，保障經濟安全」。

今次選舉焦點包括：壓抑米油物價、消費稅減稅、外國人政策、黨內重建。高市承諾「危機管理式投資」推動經濟增長，並保持同特朗普總統領導下嘅美國對話。

民調方面，高市同小泉旗鼓相當。最新民調指，小泉略為領先，但高市緊追。雖然民調不錯，但國會議員支持度偏低，可能會成為高市最大障礙。不過，佢近年大力經營網路平台，拉攏年輕世代，加上參政黨等右翼政黨冒起，保守派力量增強，或會成為助力。

若高市成功當選，將成為日本史上首位女首相，日台關係可能更緊密，但同時中日關係或會惡化。結果將於10月4日揭曉，高市能否打破傳統，為日本開創「女性時代」，就要睇今次投票。