自從美國總統特朗普喺8月啟動緊急治安增援行動以嚟，華盛頓特區已有超過50人面臨聯邦指控。不過，美國地方法院近期撤銷咗至少11宗相關案件，引發法官對檢察官「草率起訴」嘅質疑。法官直言，呢個異常高嘅撤銷率浪費法院資源，亦顯示出特朗普派兵入城嘅問題：大規模拘捕雖然帶嚟驚人數字，但喺司法審查下卻難以維持。
美國地方法院法官沙博（Matthew Chubb）日前應美國檢察官皮羅（Jeanine Pirro）辦公室要求，駁回咗兩宗重罪攻擊案件。佢喺庭上直言，檢察官似乎未經充分調查同審視就急於起訴：「呢啲事唔應該發生，已經對法院運作造成實際影響。考慮到案件數量之多，呢個問題已經成為重大憂慮。」
除咗法官批評，大陪審團亦對部分案件表示質疑。至少六宗獨立案件中，大陪審團八次拒絕起訴，呢個罕見嘅情況反映出對起訴證據強度嘅懷疑。地方法官沙博早前就批評，皮羅辦公室處理大量案件嘅方式損害咗政府嘅聲譽，指出該辦公室經常提起唔屬於聯邦法院管轄嘅案件，仲會喺審查指控期間，無必要咁將當事人扣押幾日。
白宮表示，自8月7日增援行動開始以嚟，華盛頓特區已經有超過2,000人被捕。法院紀錄顯示，至少52人因增援相關罪行喺地區法院被指控，仲有更多案件喺哥倫比亞特區高等法院處理。皮羅辦公室發言人就強調：「美國檢察官皮羅同佢嘅團隊處理超過1,700宗案件，一直係依據證據、嚴格依法，並持續評估案件進展，喺符合正義利益情況下先撤銷案件。」
特朗普聲稱，呢項為期30日嘅緊急部署，動員聯邦特工同國民警衛隊，係為咗提供更安全嘅街道俾特區居民。不過，不少案件喺法庭上難以獲得支持。被撤銷嘅案件之中，有啲涉及嚴重指控，例如襲擊聯邦特工同非法持槍，但最終因證據不足或者程序問題而喺開庭前撤銷。例如，有人向兩名南卡羅來納州國民警衛隊員吐口水，就被檢察官嚴重攻擊罪，而最終要被撤回，改為喺哥倫比亞特區高等法院以輕罪起訴。另一案例涉及一名越南裔男子，佢被控8月23日襲擊一名試圖制止街頭打鬥嘅聯邦探員，但檢察官完全放棄重罪起訴，亦無再提出新指控。該男子出庭時手臂纏住繃帶，聲稱自己喺被捕時手臂斷咗，仲喺監獄被關足足五晚。佢對記者話：「呢個係我人生中最恐怖嘅經歷。」呢啲案例顯示，緊急增兵雖然帶嚟大量拘捕，但喺司法程序中往往顯得證據薄弱。
皮羅曾任福克斯新聞主持人，並喺2025年5月由特朗普任命為美國檢察官。佢回應批評時反擊，指前聯邦檢察官法魯基嘅司法判斷受政治觀點影響，仲批評大陪審團拒絕起訴兩名被控威脅特朗普嘅疑犯，直言「個司法系統喺好多層面都存在問題。」
另一方面沙博法官喺2024年10月獲任命，係負責審理增援相關案件初次出庭同拘留聽證會嘅四名地方法官之一。佢要求檢察官解釋撤銷重罪嘅原因，但檢察官只話係基於證據審查，無詳細交代問題所在。
特朗普嘅緊急增兵行動，喺行政層面同司法程序之間嘅緊張，引發左外界對呢次行動成效同正當性嘅懷疑。
