巴西最高法院一個合議庭，早幾日以4票對1票裁定前總統博爾索納羅（Jair Bolsonaro）同佢7個核心盟友策劃政變罪名成立，博爾索納羅被判坐監27年3個月。呢個係巴西史上首位因為政變罪而俾人定罪嘅前總統。雖然係咁，博爾索納羅嘅刑罰仲未即時執行，被告仲可以上訴，要等晒所有法律程序搞掂，判決先至有法律效力。

美國總統特朗普早前已經形容呢個係針對博爾索納羅嘅「政治獵巫」，仲大大力批評巴西政府。佢曾經對巴西出口嘅咖啡同牛肉呢啲商品加徵關稅，又引用《馬格尼茨基法案》（Magnitsky Act）制裁呢單案嘅主審法官摩賴斯（Alexandre de Moraes），話對方「違反基本自由」。

巴西最高法院大法官認定，博爾索納羅喺2022年輸咗俾現任左翼總統盧拉（Luiz Inácio Lula da Silva）之後，主導成個陰謀，想繼續掌權。法院裁定，博爾索納羅同好多政府高層喺2021至2023年期間，密謀阻止盧拉就職。佢哋散播選舉假消息、叫軍隊幫手、諗住搞政變，甚至考慮實施戒嚴。雖然呢個計劃因為軍隊唔夠支持所以搞唔成，但最終搞到佢啲支持者喺2023年1月8號衝入巴西國會、總統府同最高法院，搞到一鑊粥。

投下關鍵一票嘅法官卡門·盧施亞（Cármen Lúcia）話，博爾索納羅搞出「叛亂」，仲裁定晒五條罪名都成立，包括想發動政變、帶領武裝犯罪組織、想用暴力廢除民主法治等等。盧施亞將呢場政變比喻做一種「病毒」，仲希望呢次審判可以係一劑解藥。

根據巴西傳媒報導，博爾索納羅被判坐監27年3個月，當中包括：坐24年9個月嘅封閉式監獄；仲有2年6個月嘅拘留，屬半開放或者開放式監禁。另外，佢仲要交124日嘅罰款，每日嘅罰款額係當地最低工資嘅兩倍，總共大約係7萬美元（即係55萬港幣左右）。

合議庭分析埋其餘7個被告嘅個人行為之後，分別作出判決，最高判監26年。博爾索納羅嘅前貼身助手薛（Mauro Cid）喺呢單案中做污點證人，同檢控官達成認罪協議，最終獲判最多兩年嘅開放式監禁。

特朗普同博爾索納羅喺政治理念上面勁似，兩個人都係奉行保守價值，喺任內都好強調國家主權同反左翼立場。博爾索納羅曾經多次公開讚特朗普，仲喺2020年美國總統大選之後，支持特朗普對選舉結果提出嘅質疑。佢哋兩個俾人睇成係「右翼盟友」嘅代表人物。

特朗普對於博爾索納羅被判刑，感到「震驚同唔滿意」。佢暗示呢單案同佢自己喺美國面臨嘅司法挑戰好似，覺得博爾索納羅嘅遭遇可能代表言論自由受到打壓。美國國務卿盧比奧（Marco Rubio）亦喺社交平台X上面寫文，話巴西最高法院嘅法官判決唔公正，仲揚言美國會對呢場「獵巫行動」作出回應。

巴西外交部就即刻回應，大大力譴責美方嘅言論同埋潛在嘅軍事威脅，重申三權分立制度好穩陣，仲話「反民主勢力想操控外國政府嚟威脅國內機構」。巴西傳媒指出，呢場外交風波唔單止係對特朗普政府立場嘅挑戰，更係巴西堅定咁捍衛自己嘅主權同司法獨立。

國際傳媒普遍形容呢單案係「巴西民主嘅關鍵時刻」。呢次判決加劇咗博爾索納羅支持者同司法機構之間嘅緊張關係，亦可能重塑巴西嘅右翼政治版圖。特朗普同博爾索納羅嘅政治聯繫，搞到呢單案唔單止係巴西嘅內政問題，仲成為全球右翼運動同民主制度衝突嘅縮影。