美國保守派青年領袖、總統特朗普嘅重要盟友Charlie Kirk，尋日喺猶他州一間大學校園演講嗰陣，突然中槍身亡，得年31歲。呢單暗殺案震驚全美，特朗普隨即發聲明，形容係「美國嘅黑暗時刻」，並誓言要將所有涉案人士繩之於法。

美國有線電視新聞網（CNN）同法新社報道，Kirk喺猶他谷大學出席活動時，正喺面對大批群眾發表演說，點知突然傳嚟一聲槍響，佢即時倒喺張櫈度。現場畫面顯示，當時場面一片混亂，人群驚慌失措，而攝影機亦迅轉移。調查人員初步判斷，呢一槍係由校園天台一個著黑衫嘅神秘人射出，懷疑係一單有預謀嘅狙殺行動。

事發後，美國總統特朗普喺白宮橢圓辦公室拍咗段四分鐘嘅影片，對Kirk嘅死表達深切悲痛同憤怒。佢話：「Kirk喺猶他州一間大學校園俾人可恥地暗殺，令我既悲痛又憤怒。佢啟發咗數百萬人，所有識佢同愛佢嘅人，今晚都陷入震驚同痛苦之中。」

Kirk生前以喺全美各大校園搞戶外辯論而聞名，積極推廣保守主義理念 ，雖然佢冇大學學歷但成日拗到啲大學生啞口無言。佢係個福音派基督徒，宗教同家庭係佢政治理念嘅核心 。特朗普形容Kirk生前行遍全美國，進行「善意嘅辯論活動」。佢讚揚Kirk「為真理同自由而殉道」，並向佢嘅家人致以祈禱同哀悼。特朗普亦提到，Kirk係個虔誠嘅教徒，相信佢已經安息喺天堂，帶俾大家一絲安慰。

特朗普進一步痛斥「極端同政治暴力」事件，並承諾將會採取更全面嘅行動嚟打擊呢類罪行。佢重提自己喺舊年七月喺賓州遭遇嘅暗殺未遂，以及舊年十二月醫保公司執行長湯臣喺紐約酒店入口被槍殺嘅案件。

佢話：「我嘅政府團隊會追查所有參與呢次暴行同其他政治暴力嘅人，包括資助同支持呢啲行為嘅組織，以及追殺我哋法官、執法人員同所有維護國家秩序嘅人。」

特朗普亦話，美國民眾同媒體必須「認清一個事實，就係將意見唔同嘅人妖魔化，最終只會招致暴力同謀殺嘅悲劇」。

不過，英國廣播公司（BBC）指出，特朗普經常將美國日益加劇嘅政治分裂，歸咎於「激進左翼」。批評者認為，佢嘅言辭反而助長咗針對政治對手嘅暴力行為。

諷刺嘅係，Kirk本人喺幾個月前，曾經喺一個關於擁槍權嘅討論中表示：「遺憾嘅係，如果為咗捍衛第二修正案，每年都要付出若干槍擊死亡嘅代價，咁亦係值得嘅。」美國憲法第二修正案賦予民眾持有同攜帶武器嘅權利，都算係為信念而殉難。