中國喺北京舉行嘅二戰日本戰敗80週年閱兵式上，高調展示咗一系列先進軍事技術，引起全球關注。呢場軍事表演唔單止突顯咗解放軍嘅現代化成果，仲向潛在嘅國際買家發放訊號，中國軍工已經具備挑戰頂尖對手嘅能力。專家分析認為，今次閱兵可能幫助中國喺全球武器出口市場超越俄羅斯，進一步鞏固主要軍事強國嘅地位。

中國今次展示嘅尖端武器包括無人機、隱形戰機同高超音速導彈。國家主席習近平親自出席，並且有26個國家領導人到場，包括印尼總理普拉博沃同越南國家主席梁強。呢種「軍事外交」嘅安排，清楚反映中國想藉軍事影響力擴大國際存在。

根據斯德哥爾摩國際和平研究所（SIPRI）數據，2020至2024年間，中國武器出口佔全球5.9%，排第四，僅次於美國、俄羅斯同法國。相比之下，俄羅斯因為烏克蘭戰爭重創，武器出口大跌64%，份額由2012年嘅30%跌到2024年嘅4.6%。呢正好為中國爭奪市場留出空間，特別係俄羅斯傳統客戶群。

中國嘅武器以「平價兼少條件」見稱，喺亞洲、非洲同中東市場相當吸引。例如：巴基斯坦引進054A/P護衛艦同J-10戰機，沙特同埃及購買翼龍無人機，用嚟填補美國禁賣嘅市場缺口。雖然好多系統都基於俄羅斯技術嘅逆向工程，啫係偷對家技術，但中國進行咗改良，例如HQ-9同HQ-17防空導彈，價錢平過西方產品，而且唔會附加嚴格政治條件。

不過，中國武器出口仍有挑戰：部分買家投訴可靠性同售後服務不足，影響聲譽；更重要嘅係地緣政治。好多美國盟友，好似日本、南韓、澳洲等 為咗鞏固同西方嘅戰略關係，寧願買美歐武器。SIPRI研究員魏澤曼指出，武器採購唔單止係技術問題，更係政治同軍事聯盟嘅體現。

美國作為全球最大武器出口國，2020至2024年佔43%市場，係中國嘅七倍。美國出口唔單止賣硬件，仲提供長期訓練、維修同安全承諾，呢啲係中國暫時取代唔到嘅優勢。再加上美國對中國軍工企業嘅制裁，進一步限制中國打入特定市場。即使沙特同中國合作無人機項目，其主力裝備仍來自美國，以確保同華盛頓嘅戰略關係。至於印度，雖然係俄羅斯傳統客戶，但現時轉向美國同法國，而唔係中國。

俄羅斯受戰爭壓力影響，無法準時交付武器，例如延遲交貨畀印度同喀麥隆，令部分國家轉向中國。中國亦向俄羅斯出口雙重用途技術（半導體、無人機零件等），鞏固咗喺俄市場嘅角色。分析認為，中國未來有望藉住非洲同東南亞市場（如巴基斯坦、緬甸、阿爾及利亞等）持續擴張。

中國嘅軍事展示無疑提升咗競爭力，要超越俄羅斯唔係難事，但要挑戰美國嘅霸主地位，仍有漫長路要走。品質、地緣政治同市場信任，係中國武器出口嘅三大關卡。