具路透社報道，中國國家主席習近平尋日（3號）喺北京舉行嘅「九三閱兵」典禮上，同俄羅斯總統普京、朝鮮領導人金正恩等一眾外國元首同場現身。有現場收音咪錄到，佢哋三人並肩行去天安門城樓嘅時候，傾得好開心，其中一段關於「長生不老」嘅對話，仲喺中國官媒直播中意外曝光，引起網上熱議。

事發嗰陣，習近平企喺中間，普京同金正恩就企喺佢左右兩邊。三人邊行邊透過翻譯傾計，言談甚歡。其中一段對話，聲音特別清晰。一開頭，金正恩話好高興再見到習近平，習近平就回應：「我都好高興，好耐冇見」。之後有一段路冇聲，直到佢哋傾到年紀嘅時候，聲音又再清晰返。

普京嘅翻譯用漢語同習近平講：「生物科技繼續發展，啲器官會不斷移植，人會越活越後生，甚至可以長生不老。」習近平聽到之後就回應：「好難預測」，跟住仲話：「呢個世紀，人可能可以活到150歲。」據外媒報導，對話期間，企喺隔離嘅金正恩一直面帶笑容，望住習近平同普京，但就唔清楚有冇人幫佢翻譯呢段對話。

呢段對話全程喺中央電視台直播出街，美聯社同路透社等外國媒體都有轉播。事後，普京都親口證實，確實同習近平傾過相關話題，仲話以現代醫療發展，人類有望以唔同於今日嘅方式繼續積極生活，預期壽命將會大幅提高。

旅居美國嘅資深政評人蔡慎坤就話，佢有留意呢段對話，特別係由「器官移植」到「人可以活到150歲」呢段，聲音非常清晰，而且有前文後理，顯示唔係直播意外或者出錯，而係官方特登放呢段內容出嚟，想借住閱兵直播嘅機會向外界公開。

蔡慎坤認為，呢段對話好值得各界關注同警惕。佢話當習近平講「人可以活到150歲」嘅時候，其實係暗示佢要長期做莊，冇打算交出權力，亦都代表之前話習近平搵緊接班人嘅講法根本係老作。 佢指呢個對話就係要昭告全世界，唔好指望佢哋會落台。

蔡慎坤仲話，中俄近年大力發展生物科技，相信呢段話係佢哋嘅真實想法，佢哋嘅領導人正投入大量嘅科技同人才去追求長生不老。佢補充，中俄朝伊組成嘅聯盟，已經對民主自由世界構成威脅，今次閱兵坐實咗中俄朝聯盟已經完成，正挑戰原有嘅世界秩序同國際地緣政治格局。佢總結話，呢批獨裁者執政嘅時間越長，對世界嘅威脅越大，如果佢哋真係可以活到150歲，將會對全球構成嚴重嘅安全威脅。