美國加州北區聯邦法院法官布雷耶（Charles Breyer）裁定，總統特朗普今年6月派遣4000名國民警衞隊同700名海軍陸戰隊進駐洛杉磯嘅行動，觸犯咗1878年《禁止使用軍隊執法法》（Posse Comitatus Act），屬於非法。布雷耶即時發出禁制令，禁止聯邦政府喺加州再用軍事力量去做逮捕、搜查、交通管制同群眾控制等執法工作。判決將會喺9月12日正式生效，對特朗普政府打算喺全國多個城市推動軍事部署嘅計劃構成重大挑戰，並引爆新一輪政治同法律爭拗。

布雷耶喺52頁嘅裁決書入面直斥，特朗普政府喺洛杉磯設警戒線、做交通管制、驅散群眾，明顯違反《禁止使用軍隊執法法》，因為呢條法例清楚規定，聯邦軍隊唔可以介入國內民事執法，除非有國會特別授權。佢強調，雖然洛杉磯有抗議活動，仲涉及暴力，但未去到「叛亂」程度，而地方警方完全有能力控制局勢。佢批評特朗普同國防部長赫格塞斯嘅做法，幾乎係想「建立一支由總統直接指揮嘅全國警察部隊」，嚴重威脅美國憲政分權。

加州州長紐森對裁決表示歡迎，話「法庭係企喺民主同憲法一邊」。佢早喺6月已經入稟，控告特朗普擅自聯邦化加州國民警衞隊，完全無諮詢地方政府。加州檢察長邦塔（Rob Bonta）都狠批特朗普「嚴重濫權」，將軍事力量硬生生壓落地方社區。紐森仲喺社交平台講：「特朗普再一次敗訴，法院認同佢軍事化街道、針對公民嘅行為係非法嘅。」

白宮發言人凱利（Anna Kelly）就強烈不滿，指布雷耶係「叛逆法官」，企圖「篡奪總統作為三軍統帥嘅權力」，又狠批「極左法院」阻撓特朗普「令美國再次安全」。佢仲強調，特朗普會繼續保障守法公民，並會上訴：「呢件事仲未完。」司法部已經講明，會喺9月12日前向第九巡迴上訴法院提出上訴，勢必掀起新一輪法律戰。

雖然判決只適用於加州，但對特朗普計劃喺其他城市推動軍事部署，構成潛在障礙。特朗普8月已經喺華盛頓特區部署國民警衞隊，聲稱應對「犯罪緊急狀態」，仲放話會喺芝加哥、紐約、巴爾的摩同奧克蘭採取類似做法。布雷耶警告，特朗普嘅言行顯示佢有意全國性地違反《禁止使用軍隊執法法》，恐怕會進一步侵蝕地方警權。

特朗普嘅芝加哥部署計劃尤其引人關注。佢喺truth social上聲稱芝加哥係「全球最危險城市」，承諾要「迅速解決犯罪問題」。不過，芝加哥警方數據顯示，截至8月中旬，當地暴力罪案比去年同期下降23%，兇殺率更有望創近50年新低。伊利諾州州長普利茨克（JB Pritzker）同芝加哥市長約翰遜（Brandon Johnson）強烈反對，指行動「違憲同非法」。普利茨克狠批，聯邦政府真係關心治安，就應該派更多聯邦執法人員，而唔係用軍隊去「侵略」。約翰遜更加簽行政命令，禁止地方警察配合聯邦軍隊。

伊利諾州民主黨國會議員亦聯名去信特朗普同國防部，要求即刻停止派兵芝加哥，直斥呢舉「同安全無關，而係濫用行政權力」。據《華盛頓郵報》報道，五角大廈已經密謀數星期，考慮派遣幾千名國民警衞隊員到芝加哥，顯示特朗普政府對加州裁決完全無放在眼內，仍然執意推動軍事化策略。

布雷耶嘅判決為其他州提供咗法律指引。專家指出，如果特朗普喺其他城市重複類似部署，將可能面臨更多訴訟挑戰。雖然現時仲有約300名國民警衞隊員駐守洛杉磯，但佢哋嘅任務已經被嚴格限制，只能保護聯邦財產，唔准參與執法。呢單案突顯咗特朗普政府同民主黨州政府之間，圍繞權力邊界嘅尖銳對立，未來法律戰好可能會燒到全國。