繼早前政府買水買中「冒牌貨」之後，政府招標採購又再爆出公僕不滿的風波。港九拯溺員工會踢爆，康文署突然棄用咗十幾年嚟為救生員提供嘅日本品牌美津濃跑鞋，改用一個叫「JWS」嘅運動鞋品牌，話係為救生員日常訓練同工作用。點知新鞋質素麻麻，半年內收到幾百宗投訴，唔少救生員試過新鞋後腳痛、起水泡，甚至扭傷，仲有啲直接棄用新鞋！工會仲質疑，供應商JWS Worldwide Limited之前只係賣行李篋同帳篷，點解突然有波鞋供應？今次採購真係「慳得十萬蚊，傷咗幾百人」？

過往康文署為救生員提供嘅制服，當中包括一對運動鞋，之前12年一直用日本品牌美津濃嘅跑鞋。救生員平日會着呢對鞋嚟做跑步、肌耐力訓練，甚至喺災害後清理泳灘時保護雙腳。美津濃鞋款質素有保證，救生員用得放心又安全。

港九拯溺員工會主席程凱霆提到，過往康文署喺採購新制服或裝備時，會好有規矩咁請教工會意見，先畀貨辦試用，工會試完滿意先簽同意書，之後署方再正式採購。如果工會唔簽同意書，署方會再搵新貨辦畀工會試，直至搵到啱用為止。

但去年8月底，康文署喺一次諮詢其他裝備嘅場合，突然話要換新波鞋，仲即場拎兩個貨辦畀工會試。工會成員試完即刻覺得質素「好唔掂」，鞋底硬到似石頭，當場同署方反映唔滿意，仲無簽任何同意書。點知署方完全唔理，兩星期後就直接買咗其中一款JWS波鞋，畀晒救生員用！

程凱霆話，新鞋品牌「JWS」嘅標籤上寫明唔適合高強度運動，但救生員嘅工作同訓練要求好高，點可能用呢啲鞋？結果好多救生員着咗新鞋跑步後，腳底起水泡、關節痛，甚至有扭傷情況。過去半年，工會收到幾百宗投訴，唔少救生員已經忍唔住，索性唔着新鞋，寧願自費買其他鞋用。

更離奇嘅係，工會查過新鞋供應商JWS Worldwide Limited，發現呢間公司之前只係賣行李篋、帳篷、垃圾桶同勞工手套等，網頁上完全搵唔到任何波鞋嘅蹤影！程凱霆質疑，點解康文署會搵一間無運動鞋經驗嘅公司做供應商？據知新鞋每對比舊款美津濃平約120蚊，署方今次買咗800對，總共「慳」咗大概10萬蚊。工會批評，呢啲所謂「慳錢」根本係犧牲救生員嘅安全同健康！

程凱霆仲提到，工會曾經問過康文署，如果救生員因為着新鞋受傷，會唔會當工傷處理，但署方完全無回應。佢形容，今次係康文署第一次喺無工會同意下買裝備，工會對此好失望，仲話「真係好嬲，點解會咁樣？」工會強烈要求署方回收呢批JWS波鞋，重新提供合規格、真正啱用嘅運動鞋畀救生員。

康文署回覆查詢時話，2024年透過報價程序，向JWS Worldwide Limited買咗大約800對運動鞋，總值約12萬4千4百，畀泳灘同泳池嘅救生員同濾水機房技工用，話係符合報價文件嘅技術規格。署方又話，最近有收到員工關於新鞋嘅意見，會同供應商跟進。