最新一份《小學概覽》出爐，數字顯示，全港官立同津貼小學有53間今年要縮班，扣除部分學校加開班級後，全港小一班數「淨減」13班，其中觀塘區受影響最嚴重。資助小學校長會名譽主席張勇邦今日接受電台訪問時表示，本學年全港小學縮班總數達55班，雖然較上學年68班為少，但主要係因為人才計劃下人才子女來港升學，略為舒緩班數下跌情況。

張勇邦特別指出，好似啟德咁嘅新發展區，因為陸續有新屋苑落成，區內學校雖然要增設小一班別，但實質情況係恢復之前縮班嘅班別，而唔係真正嘅增長，形容目前嘅情況依然非常嚴峻。佢仲話，今年全港已經有15間小學淪為「單班學校」，只開一班小一，殺校警號響起，令業界同工「如履薄冰」、「心驚膽顫」。根據目前數字推算，下學年適齡升小一嘅學童人數將會再跌1600人，以每班25人計，意味住下學年將會再減64班，縮班問題勢將持續惡化。

張勇邦認為，雖然人才計劃帶來咗一定數量嘅新生，但唔係所有學校都能夠受惠，尤其係地區間嘅差異仍然明顯。佢指出，人才子女多數集中係市區學校，令新界或者偏遠地區嘅學校受惠有限。面對結構性嘅學齡人口下跌問題，政府應該研究更全面嘅結構性政策，例如加強對新移民學生嘅教育支援、檢討學校班級結構，以及提供資助鼓勵學校轉型發展，避免殺校問題進一步惡化。

教聯會副會長兼選委界立法會議員鄧飛今早喺電台節目中強調，香港小學持續縮班，長遠肯定會影響中學嘅收生情況。佢指出，人口老化問題導致適齡入學嘅兒童人數持續下降，而現時政府推動嘅人才計劃帶嚟嘅子女多數係以插班形式入讀唔同級別，唔係集中喺小一、小二，因此根本冇辦法準確預測來港升學嘅人數，學校亦難以提前規劃開班安排，對紓緩縮班問題冇乜實質幫助。

鄧飛更提到，不排除政府可能會進一步提高開班門檻，希望政府盡快講清楚政策背後嘅理念。如果政府只係想加快「殺校」，而冇實質嘅長遠規劃，例如提升教育質素、改善學校資源配置，相信業界反彈會相當大。佢呼籲當局應盡快展開跨部門討論，針對結構性人口問題提出清晰嘅應對措施。