本地著名編劇莊梅岩昨日喺社交平台發表公開信，控訴母校香港演藝學院喺校慶40周年期間，邀請佢拍攝傑出校友訪問片段，最後竟然在完全無通知之下，將佢嘅影片從系列中抽走，令莊梅岩極度不滿。莊質疑事件係因為佢嘅影片無法上載到內地社交平台「小紅書」，批評校方嘅做法係「自製紅線」，並且嚴重損害「創作人」以及整個「香港表演藝術界」嘅尊嚴，要求校方於三個工作天內以書面正式回應。事件隨即引起本地藝文界嘅廣泛關注。

香港演藝學院回覆傳媒查詢時表示，一直以嚟都十分感謝所有校友及成員對學院40年以來嘅貢獻；而莊梅岩校友對戲劇界作出咗唔少嘅貢獻，學院會繼續就事件與莊梅岩保持聯絡。

莊梅岩喺公開信詳細描述，指校方學生招募拓展處去年5月主動邀請佢回校拍攝講座，作為40周年慶祝活動之一。莊憶述，當時佢母親剛離世，父親又患重病，本來已謝絕所有訪問同講座，只希望可以好好休息。不過，出於對母校嘅感情同責任感，佢最終仍然喺一個月後返到學校拍攝，過程亦完全配合校方要求。

「我唔係罪犯」 莊梅岩直斥遭母校侮辱

莊梅岩強調，自己今年3月份曾經順利參加敦煌遊學團，亦能自由出入內地，清晰表明自己「唔係罪犯」。雖然唔清楚校方所講嘅影片無法上載小紅書嘅真正原因，但佢認為校方基於「虛無嘅線索」作出咁決定，令佢感到極度失望同心痛，更覺得自己嘅時間同愛意被完全辜負，直言「呢個係一種侮辱，仲要係嚟自我嘅母校。」

佢又指出，自己喺業界已經獲獎無數，更自2016年起一直以匿名形式捐款畀母校設立獎學金，支持後輩發展。莊梅岩要求校方三日內以書面方式回覆，清楚交代係邊個人決定抽起片段、影片不能上載小紅書是否真正原因、以及點解從來冇通知佢本人。佢亦強調，如果事件係誤會，希望校方願意公開澄清。

莊梅岩提到，事隔一年後主動向校方查詢，居然過咗三日先得到含糊其辭嘅回覆，更得悉早喺今年1月份，校方已經陸續將相關訪問片段上載到小紅書，唯獨莊梅岩嘅影片未能成功上載。更令佢無法接受嘅係，校方喺今年4月份將整個系列嘅訪問片段同步上載到香港嘅社交平台時，亦剔除咗佢嘅影片，而佢本人完全蒙在鼓裏。莊梅岩批評校方「自製紅線」，直言：「如果我唔追問，係咪完全冇人打算通知我？禮貌去咗邊？尊重去咗邊？真係將我棄之如敝屣，連做人基本嘅禮儀都冇。」

莊梅岩最新喺Facebook貼文表示，公開信只係開端，預告會陸續披露更多內幕，特別係關於去年校董會換屆後出現嘅種種問題同亂象。佢更表示：「我一定會鉅細靡遺為香港記低呢啲荒誕嘅事，各位可以買定花生。」