俄羅斯總統普京抵達中國天津，出席上海合作組織領導人峰會，以及紀念抗日戰爭勝利80週年嘅九三閱兵活動。普京接受新華社書面專訪時直言，日本以虛構嘅「中俄威脅」為藉口，軍國主義正在復活。佢強調，俄羅斯同中國喺歷史問題上立場一致，堅決譴責任何歪曲二戰歷史、美化納粹或軍國主義者、抹黑解放者嘅企圖。佢指出，已經寫入《聯合國憲章》同其佢國際文件嘅二戰成果係不可動搖，任何篡改歷史嘅行為都唔能接受。呢番言論迅速喺日本國網絡同傳媒間引起激烈反應。

普京點名批評日本「歪曲歷史」，不少人日本人留言反問：「到底係邊個喺歪曲歷史？」、「你都有面講？」。有日本報社，認為普京以「軍國主義復活」為題，意在突顯中俄喺歷史問題上嘅團結。普京借「中俄威脅論」指責日本復活軍國主義，背後帶有地緣政治考量。整體輿論對普京言論普遍不滿，認為佢誇大咗日本近年防務政策嘅調整。

雖然中國官方冇直接用「日本軍國主義正在復活」呢個講法，但中共中央政治局委員兼外交部長王毅喺8月15日日本戰敗紀念日時亦發表咗相關評論。佢指80年前日本接受《波茨坦公告》無條件投降，但今日仲有部分日本勢力美化侵略、否認歷史，甚至企圖推翻戰犯判決，呢啲行為係挑戰《聯合國憲章》同戰後國際秩序。王毅強調，要以史為鑑、勿忘過去，先能避免重蹈覆轍，敦促日本作正確選擇。呢種表態同普京嘅言論喺譴責歷史修正主義方面互相呼應，突顯中俄之間嘅共鳴。

普京言論唔單止喺網絡發酵，仲喺日本政治同學術界掀起波瀾。近年，日本因應地緣政治局勢變化，逐步放寬防衛限制、增加軍費，並加深同美國盟友嘅合作。普京將呢啲舉動視為「軍國主義復活」，但日本國內多數聲音認為呢啲只係國防現代化，唔可以同歷史軍國主義劃上等號。有分析指出，普京此舉係想挑動中日矛盾，同時為中俄合作造勢，企圖將日本塑造成地區不穩定因素，藉此轉移國際社會對俄羅斯自身行為嘅關注。

東亞嘅二戰歷史問題一直都好敏感，從教科書爭議、戰爭紀念，到靖國神社參拜，中日韓之間屢次爆發外交糾紛。普京今次出招，無疑令爭議再升溫。雖然日本外務省暫時未正式回應，但消息人士透露，日本政府可能會透過外交渠道表達不滿，並重申自己嘅歷史立場。