德國警方正逐步擴大使用由美國科技公司Palantir開發嘅監控軟件。呢套以人工智能分析見稱嘅系統，可以喺幾秒內處理龐大數據，串連起個人姓名、年齡、住址、罰款紀錄、前科，以至手機數據同社交媒體內容，一下就畫出一幅「人肉全景圖」。對警方嚟講可謂「如虎添翼」，但對私隱權倡議者同公民組織而言，呢正正係數碼極權嘅前哨。

目前，德國已經有四個聯邦州用緊Palantir，分別係巴伐利亞州（Bavaria）、黑森州（Hesse）、北萊茵-威斯特法倫州（North Rhine-Westphalia）同巴登-符騰堡州（Baden-Württemberg）。巴伐利亞叫呢套系統做「VeRA」，黑森則用「HessenData」。截至2025年7月，單係巴伐利亞，就喺大約150宗案件中用過，包括2024年慕尼黑以色列總領事館被襲一案。警方話，呢套系統可以由分散嘅資料搵出潛在威脅，提早預警。但批評者指，即使用咗Palantir，阿沙芬堡一宗疑似伊斯蘭極端主義襲擊案都照樣發生，反映系統唔係萬能。

Palantir最受爭議嘅地方，就係佢「無底線」咁分析數據。佢支援「數據挖掘」（data mining），容許警方將原本應該分開儲存嘅資料混埋一齊分析，包括報警紀錄、受害人資料、甚至你喺網上講過啲乜都可能中招。就算你冇嫌疑，只係「喺錯嘅時間出現喺錯嘅地方」，都有機會被納入監控。

非牟利組織「自由權利協會」（GFF）法律顧問戈爾利茨（Franziska Görlitz）批評呢種做法違反咗《德國基本法》保障嘅訊息自決權。GFF已經就巴伐利亞做法向聯邦憲法法院提告。值得一提嘅係，黑森州喺2023年GFF勝訴後收緊咗規定，但巴伐利亞仍然放任。至於北威州，類似案件仲等緊裁決，而當地授權用Palantir嘅條文預計到2025年底屆滿。州內政部長羅伊爾（Herbert Reul）話，未搵到替代方案前會繼續用。

喺聯邦層面，態度亦唔一致。前內政部長費瑟（Nancy Faeser）喺2023年明文禁止聯邦層面機構用Palantir，但接任者多布林特（Alexander Dobrindt）就為聯邦刑警局（BKA）開後門，話未來可能照買。BKA局長明希（Holger Münch）話急需類似系統，但強調要由德國或者歐洲自己研發：「我哋唔可以依賴不可預測嘅夥伴。」聯邦議員諾茨（Konstantin von Notz）就直言多布林特講到似Palantir代言人，仲批評喺美德關係緊張之下，唔應再依賴美國科技。

公眾亦紛紛表達不滿。GFF發起嘅憲法訴訟獲得廣泛支持，德國請願平台Campact上，反Palantir請願短短一星期就有超過26萬人簽名。專家警告，Palantir喺美國叫「Gotham」嘅系統，已經廣泛應用喺情報、軍事甚至邊境管制上，潛在風險猶如中國嘅社會信用系統，可能變成針對異見人士或者少數族群嘅工具，最終侵蝕民主同自由。