美國商務部長盧特尼克（Howard Lutnick）表示，如果中國政府唔批准TikTok嘅出售交易，呢個擁有大約1.7億美國用戶嘅短片平台，隨時要喺美國停運。

盧特尼克接受美國財經頻道CNBC專訪時直言，TikTok一定要徹底擺脫中國嘅控制，美國必須掌握其核心算法嘅監管權。他話：「我哋已經決定，唔會再容許中國又控制TikTok，又放喺一億美國人部手機度運行。」佢補充，TikTok母公司字節跳動（ByteDance）可以保留少數股權，但主導權一定要交俾美國投資者，包括技術同算法控制權。盧特尼克仲話，如果中國點頭批準交易，TikTok可以繼續喺美國營運；否則，美國會直接封殺TikTok，相關決定即將出台。

美國國會一直擔心TikTok畀中國政府有機可乘，可能偷取美國用戶嘅敏感數據，甚至操控內容影響輿論。為咗防止風險，早喺2024年4月，時任美國總統喬·拜登（Joe Biden）已經簽署「唔賣就禁」嘅法案，要求字節跳動270日內賣出TikTok俾非中國企業，否則1月19日就要喺美國禁用。不過，隨住特朗普喺重返白宮，呢項禁令嘅執行多次延期。最新一次延期喺6月，將最後限期推到9月17日。

特朗普上個月底接受福克斯新聞（Fox News）訪問時仲爆料，有班「非常有錢嘅人」準備出手競購TikTok嘅美國業務。不過，交易進度依然唔明朗。早前，私募基金巨頭黑石集團（Blackstone Group）退出競購財團，更令交易添變數。

事實上，今年春天曾有一個分拆計劃，想將TikTok美國業務獨立成一間由美國投資者控股嘅新公司，掌握技術同算法。但因為特朗普加徵中國商品高額關稅，中國政府話唔會批準，令計劃即刻取消左。

盧特尼克最新講法，清楚表明美國政府對TikTok仲係好硬淨，話美國必須握住技術同算法嘅主導權，先可以保障國家安全同用戶私隱。TikTok到而家仲未對佢嘅言論作出正式回應。

隨住9月17日死線逼近，TikTok喺美國嘅命運仍未有定案。佢能唔能夠繼續生存，要睇美國政府同中國政府能否達成一個雙方都接受嘅方案。如果談判再告吹，TikTok可能真係要同1.7億美國用戶講再見，對整個商業生態都係一個大震盪。