中國近日喺內蒙古一處試驗場進行大規模邊境管控演習，全面展示其無人機（Unmanned Aerial Vehicle, UAV）技術嘅最新進展。根據官方媒體報道，今次演習模擬未來戰場環境，涵蓋偵察、AI規劃、滲透、空襲、消滅到反介入六大作戰階段，突顯中國作為全球無人機供應大國嘅戰略地位。

演習場景聚焦喺爭奪邊境關鍵地帶，現場部署咗大量國產無人系統，包括偵察、監視同情報（ISR）無人機、遠程及短程巡飛彈藥、無人直升機，以及第一人稱視角（FPV）戰術設備。地面系統亦無缺席，涵蓋智能指揮控制平台同反無人機防禦系統，反映無人化作戰喺現代戰場中嘅重要性。

當中最吸睛嘅環節，莫過於OW-5反無人機雷射武器首次進行實彈展示。呢款武器早喺2021年珠海航展以靜態姿態現身，今次亮相係升級版OW-5A50，輸出功率高達50千瓦，所有核心部件包括雷達、光電感測器、雷射發射器以至控制系統，都整合喺一部8x8東風重型底盤卡車上，具備獨立作戰或網絡聯動能力，專門執行關鍵設施防空任務。

報道強調，OW-5A50可發射「肉眼幾乎睇唔到」嘅高能雷射光束，遠距精準擊落目標無人機，最重要係無彈藥限制，只要有電就可以不斷開火，展示中國喺反無人機技術上邁出重大一步。

除咗雷射系統，演習亦突顯傳統武器同無人系統協同作戰嘅新模式。一門155毫米榴彈炮經由偵察無人機提供即時座標後，能夠快速精準打擊目標。現場亦展示咗一款大型空中干擾機，可以喺數公里範圍內癱瘓敵方無人機嘅光電設備，有效阻斷敵方情報同通訊鏈。

特種作戰裝備方面，多款無人機展示出其多功能性。「飛蛙」係垂直起降偵察無人機，適合複雜地形滲透任務；「飛隼」屬於高速巡飛彈藥，負責快速打擊；「黑蜂」可投擲榴彈，而「飛鯨」則能投擲炸彈。呢啲裝備被形容為步兵嘅「智能拍檔」，讓單兵具備全局感知同精準打擊能力，化身「未來節點」，令戰場作戰更加資訊化。

今次演習由中國最大武器製造同出口商，由中國北方工業集團公司（NORINCO）主辦，展出左「飛龍」巡飛彈藥系列，包括短程反人員嘅飛龍-10、中程飛龍-60同高端反輻射型飛龍-300A，射程遠至300公里，針對防空雷達。部分彈型仲支援從火箭發射器、戰車或船隻平台發射，靈活應變。

報道指出，呢批所謂「自殺式無人機」（Kamikaze Drones）具備集群作戰能力，可發動飽和式攻擊（Swarm Saturation Attack），以數量壓倒敵方防線，明顯係針對反介入環境設計。

整場演習除咗驗證無人系統實戰效能，更反映中國喺未來戰爭策略上高度重視無人化作戰。近年中國加快發展空中、地面、海上多維無人平台，目標係提升打擊效率、減低人員損失。無人機成本低、機動性高，喺邊境衝突或灰區戰爭中特別有優勢。

北方工業集團嘅飛龍系列亦正加快出口步伐，據稱已獲多國軍警部門採用，用於反恐、邊防及情報任務。報道最後指出，隨住人工智慧（AI）技術進一步融入指揮鏈，無人系統已開始具備自主協同能力，未來喺面對台灣漢光演習等地區緊張局勢時，中方或會更頻繁運用無人機力量應對。