美國總統特朗普近日喺社交平台Truth Social狂轟前總統奧巴馬（Barack Obama），直指佢親自策劃並炮製2016年總統選舉入面嘅「通俄門」騙局。呢番說話即刻喺華府政圈掀起千層浪。國家情報總監辦公室亦發聲明，爆出奧巴馬政府涉嫌偽造情報，圖謀推翻特朗普勝選結果，仲話呢單嘢係「世紀大罪」，嚴重威脅到美國國家安全。

特朗普喺Truth Social發文，強烈譴責奧巴馬同佢班盟友，仲點名前國務卿希拉里（Hillary Clinton）、前總統拜登（Joe Biden）等民主黨重量級人物都牽涉其中。佢指控，呢場騙局目標就係要推翻2016年大選結果，仲令到美俄關係長期緊張。雖然特朗普聲稱有「確鑿證據」，但並無喺貼文中公開任何實質內容，只係轉發咗幾篇媒體報導同評論文章，力圖證明自己講得有道理。

而國家情報總監辦公室喺上星期五就出咗一份震撼聲明。現任情報總監加巴德（Tulsi Gabbard）披露，2016年特朗普當選之後，政府內部有人試圖捏造情報，想推翻選舉結果。聲明指出，其實美國情報單位早喺選舉前幾個月已經達成共識，認為俄羅斯冇能力亦冇明確意圖干預選舉。當時情報總監克拉珀（James Clapper）喺2016年12月7日公開表示，冇證據顯示外國勢力透過網攻改變選舉結果。

但喺兩日之後，白宮就召開一場國安會高層會議，重新檢討俄羅斯干預嘅可能性。根據會議紀錄，克拉珀一名助手隨後發出電郵，話根據奧巴馬指示，要情報部門詳細列出俄羅斯企圖干預選舉所用嘅手段同策略。最終，由國家情報總監辦公室主導，聯同中情局（CIA）、聯邦調查局（FBI）、國安局（NSA）同國土安全部等單位，一齊出咗份報告。

聲明仲揭發，奧巴馬政府高層曾向《華盛頓郵報》等主流傳媒「放料」，散播俄羅斯透過網路操作大選嘅講法。到咗2017年1月6日，一份新情報報告出爐，聲稱俄羅斯明顯偏向特朗普，甚至暗中協助佢勝選。但呢份報告嘅結論，竟然同數個月前情報界普遍嘅共識背道而馳。加巴德話，經深入調查，證實該報告係基於不可靠甚至係虛構嘅訊息，為之後幾年對特朗普發起彈劾同調查埋下伏線。

特朗普最近喺白宮橢圓形辦公室會議上，進一步狠批奧巴馬，話佢係整場「通俄門陰謀」背後嘅主腦。喺記者問到愛潑斯坦（Jeffrey Epstein）案件時，特朗普轉移話題，話奧巴馬帶頭搞「叛國政變」，指其政府掌握到「無可辯駁嘅證據」，證明奧巴馬聯同希拉里等人密謀政變。佢仲話：「文件寫得清清楚楚，就係奧巴馬主導一切。」

同一場合，特朗普又提到去年針對佢嘅暗殺企圖，話特勤局處理失當，冇安排人手上屋頂警戒，亦冇同地方警察有效溝通。佢話，當局將槍手描述成「只係一個瘋子」，根本唔可信。

除此之外，特朗普亦重炮轟擊前FBI局長科米（James Comey），話佢「極其腐敗」。仲提起由司法部監察長霍羅威茨（Michael Horowitz）嘅報告，指報告有大量對科米不利嘅內容，但前司法部長巴爾（Bill Barr）「唔夠膽」公開。特朗普更嘲諷拜登簽署文件時用自動簽名筆，話佢「根本唔知自己簽咗咩」，包括赦免一月六日事件委員會成員等「古怪決定」。

風波愈鬧愈大，特朗普近日仲上載一條具爭議嘅AI生成影片，畫面見到奧巴馬畀FBI戴上手銬，一旁嘅特朗普則冷笑咧嘴，並配上奧巴馬過去講過嘅金句：「冇人可以凌駕喺法律之上。」外界普遍認為，呢條片係特朗普「復仇計劃」起步，奧巴馬、希拉里、拜登，都成為佢打擊嘅目標。

不過，特朗普想靠呢啲指控就將奧巴馬定罪「叛國」，可能言之過早，證據到底夠唔夠仍然係未知數。但喺輿論場上，成功轉移焦點，拖低民主黨聲譽，就已經係一場勝仗。有分析認為，呢次「翻炒通俄門」背後，亦可能係為咗壓過愛潑斯坦案等其他風頭火勢嘅醜聞，而馬斯克（Elon Musk）近日亦喺言論上對特朗普開火，進一步令局勢複雜化。

整場風波，再次突顯美國政治日趨兩極化。奧巴馬作為史上最受歡迎前總統之一，若真被「動手」，極有可能引發反撲，令特朗普陣營腹背受敵。美國政壇你死我活嘅鬥爭，似乎仲未見盡頭。